Imphal, Nailar:
Ka sorkar Manipur ha ka 18 tarik u Nailar, ka la kyrpad ïa ka Campaign for Justice and Fair Delimitation (JFD) ba kan weng noh ïa ka jingïakhih kaba 48 kynta da kaba dawa ba dei ban pynthymmai ïa ka National Register of Citizens (NRC) shwa ban shim ïa ka jingkheiñ briew, da kaba ong ba ka dang pyrshang ban rah ïa katei ka mat sha ka sorkar pdeng.
Kane ka jingkyrpad ka long ha ka jingïalang bad ki nongthoh khubor ha ka tnad Directorate of Information and Public Relations (DIPR), ha kaba la ai jingkren da ki nongaiktien ka sorkar Manipur bad ki MLA u Sapam Ranjan Singh bad u Thokchom Radheshyam Singh.
U Sapam Ranjan u la ong ba ka sorkar ka sngewkhia barabor ïa ka jingdawa ban pynthymmai ïa ka NRC bad ïa ka jingeh jong ka jingdon briew ha Manipur.
U la ïathuh ba ka kynhun jong ki MLA ka BJP na kane ka jylla kan leit sha Delhi ha ka sngi Thohdieng ban rah ïa kane ka jingdawa bad ka sorkar pdeng.
“Ngi shim ïa kane ka mat na ka bynta ka jylla, ka sorkar ka don bad ki paidbah ka Manipur bad ka la ïai pynbor ïa ka NRC naduh ba sdang”, la ong u Ranjan.
U la kdew ïa ki katto katne ki sienjam ba la shim da ka sorkar jylla ban kyrshan ïa ka jingpynthymmai ïa ka NRC. Ka ïingdorbar thaw aiñ jong ka Manipur ka la mynjur ïa ka rai halor kane ka mat ha ka 5 tarik u Nailar, 2022, bad pynskhem biang ïa ka ha ka 1 tarik u Lber, 2024.
