New Delhi, Nailar:
U Myntri Rangbah ka Arunachal Pradesh u Pema Khandu ha ka lah sngi U Blei, u la ïakynduh ïa u Myntri ka tnat ki kam pohïing jong ka sorkar pdeng u Amit Shah ha New Delhi bad ai ruh ïa ka kaiphod kaba bniah halor ki kam pynroi ba la shim ha kane ka jylla ha ki shi snem ba u bat ïa ka kam.
U Khandu u la ong ba u la pyntip sha u Shah halor ki katto katne ki projek bad ki jingthmu pynroi ba kongsan kiba dang pyntreikam ha kylleng ka Arunachal Pradesh, bad u la pan ïa ka jingïalam bad jingkyrshan ba bteng jong u na ka bynta ka jylla.
Ha ka jingthoh ha ka Social Media hadien ka jingïalang, u Myntri Rangbah u la pynpaw ïa ka jingsngewnguh ïa u Shah na ka bynta ki paidbah ka Arunachal Pradesh na ka bynta ka “jingkyrshan kaba khlem artatien bad ka jingsngewtynnat kaba jur” jong u ban pynthikna ïa ka jingsuk, jingkiew bad jingroi jingpar jong ka thaiñ kaba slem.
U Khandu u la pynpaw ruh ïa ka jingdonkam ban bteng ban kyrshan ïa ki jingthmu pynroi ha ka jylla khappud.
U Myntri Rangbah u la pyndep 10 snem ha ka kam ha ka 16 tarik, Naitung.
U la long u Myntri Rangbah jong ka Arunachal Pradesh ha ka sien kaba nyngkong ha u snem 2016 bad naduh katei ka por u la bteng ban ïalam ïa ka jylla lyngba ki jingkiew ha ka kam saiñ pyrthei kiba bud ryntih.
Kane ka jingïakynduh bad u Shah ka wan hapdeng ka jingpynleit jingmut jong ka sorkar jylla halor ki jingtei, ka jingpynïasoh bad ka roi ka par ha kylleng ka Arunachal Pradesh, kaba ïasam ïa ki khappud pyrthei bad ka China, Bhutan bad Myanmar.
