Shillong, Nailar 18
Ka Little Star English Medium Higher Secondary School ka la sdang da ka jingjop ha ka kyrdan ïalehkai Under-17 ki kynthei jong ka 65th Subroto Cup International Football Tournament, hadien ba ka la lah ban pynliem ïa ka kynhun ïalehkai kaba na Chandigarh da 2-0 kol ha ka sngi Ba-ar.
Kane ka nam jop ka la wan urlong lyngba ki kol ba la thep da ka Genefa Myrthong bad ka Wandari Rani na ka bynta ban pynlong ïa kane ka kynhun ban khur ïa ki lai poiñ ha ka Pool-D.
Ïa kane ka lympung ba la pyniaid da ka Air Force Sports Control Board, la plie pyrda hynne ka sngi ha nongbah Delhi ha kaba la pynlong shwa da ka kyrdan ïalehkai Under-17 jong ki kynthei na ka bynta ban ïaknieh ban rah ïa ka trophy nam lahduh. Katba kiwei pat ki kyrdan ïalehkai Under-15 Boys bad ka Under-17 Boys yn sa bteng kham hadien.
Ha kane ka jingïakhun kaba la long ha Dr. Ambetkar Stadium kaba ha nongbah Delhi, ka Little Star ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba ka Genefa ha ka minit kaba 16. Kane ka kynhun kaba na Nongbah Bynter (Eastern West Khasi Hills) ka la pynbud ïa ka kol kaba ar lyngba ka Wandari ha ka minit kaba 25.
Wat hapdeng kane ka jingïa-khun, ka Chandigarh kam shym la lah ban pynphai bad ha kaba kut ka la mad ïa ka jingshah rem.
Te kumta ka Little Star kan pynkhreh ïa ka jingïakhun kaba ar pyrshah ïa ka International Schools Sports Organisation (ISSO) ha ka sngi Balang ha ka por 3 baje nohphai sngi.
Lah ban kdew, ka Little Star kaba la mihkhmat ïa ka Jylla ka la don ha ka Pool-D kaba kynthup lang ïa ka ISSO, Chandigarh, Dadra And Nagar Haveli and Daman And Diu (DNH & DD) bad ka Madhya Pradesh.
