Shillong, Nailar 18
Ka tnat ïalehkai jong ka Sorkar Pdeng ha ka sngi Balang ka la weng noh ïa ka jingithuh ïa ka Table Tennis Federation of India bad ka la bthah ruh ïa ka Indian Olympic Association (IOA) ban thaw ïa ka ad-hoc committee ban pynïaid ïa kane ka jingïalehkai da kaba kdew ba ki don ki jingduna ha ka rukom pynïaid hapoh ka TTFI.
Ha kane ka hukum jong ka, ka tnad ka la kdew ïa ka jingbym lah jong ka TTFI ban pynlong ïa ka ilekshon ha ka por kaba biang kum kawei na ki daw jong ka jingpynsangeh hadien ba ka la ïoh ïa ka “jingkynthoh kaba khlem sngewhun” halor ka jingpynbna kaba la pynmih ha kaba sdang jong u snem.
“Ka IOA, ha ka jingïamir jingmut bad ka synjuk ïalehkai ka pyrthei (ITTF) kan shim ïa ki sienjam kiba biang ban thaw ïa ka rukom pynïaid hapoh, kynthup ïa ka jingthaw ïa ka komiti ba kyrpang, haduh ba kan da pynphai biang ïa ka rukom synshar ba la thaw da ka TTFI,” la ong ka hukum jong ka tnad.
Ïa kane ka TTFI mynta la ïalam da ka Meghna Ahlawat, kaba dei ka President kynthei ba nyngkong jong ka kaba dei ruh ka kurim jong u MLA ka Haryana u Dushyant Chautala. U Chautala u dei u khun jong u President barim ka TTFI u Ajay Singh Chautala.
U Ahlawat u la shimti ïa kane ka kam ha u Nohprah jong u snem 2022.
Kumba ka long mynta kane ka synjuk ka la don hapdeng ka jingkhihwin ha kine ki katto katne bnai ba la dep. Ka la sospon ïa u Secretary General jong ka, u nongïalehkai barim jong ka, u Kamlesh Mehta, ha u Kyllalyngkot, namar ka jingkynnoh ba u don ka jingbym ïaid beit ha ka liang ka pisa tyngka.
