Shillong, Nailar 19
Ka Little Star English Medium Higher Secondary School ka la pynjem khnap haduh 8-0 kol ïa ka International Schools Sports Organisation (ISSO) na ka bynta ban bteng ïa ka jingjop kaba ar ha ka lympung ïalehkai 65th ubroto Cup International Football Tournament 2026 ha ka sngi Balang ha nongbah Delhi.
Ka Wandari Rani ka la khur ïa ka hat-trick na ka bynta ban pynlong ïa kane ka kynhun ïalehkai ka Jylla ban kamai 6 poiñ na ki ar sien ïakhun.
Kane ka kynhun kaba la mihkhmat ïa ka Jylla ha ka kyrdan ïalehkai Under-17 ki kynthei, ka la lah ban pynpaw ïa ka jingtbit ha ka rukom ïalehkai bad ha ka sngi Ba-ar ka la jop da 2-0 kol ïa ka kynhun na Chandigarh bad kumjuh ha kane ka sngi kaba bud ha Subroto Park Stadium, New Delhi.
Kumba ka paw ka Little Star ka la lah ban pynpaw ïa ka jingtbit ha kaba ka la ïakhun tyngeh naduh kaba sdang ha kaba ka la ïoh ban pynkhih jar nyngkong eh ha ka minit kaba 22 lyngba ka Bansara Rynshiang. Hadien hynriew minit kane ka kynhun ka la pynbud biang ïa ka kol kaba ar lyngba ka Jesica Myrthong.
Hadien shiteng kynta ka Little Star ka la ïoh ban thep kol biang lyngba ka Wandari Rani ha ka minit kaba 32 bad 38. Kumjuh ka Genefa Myrthong ka la thep ha ka minit kaba 34. Kane ka ‘thei ïalehkai shakhmat ka la thep biang sa shi kol hahwa ban kut ka jingïalehkai jong ka kylla step ha ka minit kaba 40 bad ban khur syndon ïa ka hat-trick na ka bynta ban tam da 6-0 kol.
Hadien ba la thep biang ïa ka jingïakhun jong ka kylla miet ka Little Star ka la thep biang sa ar kol lyngba ka Bansara (52) bad kawei pat da ka Genefa (55) na ka bynta ban khur syndon ïa ka jingjop.
Ka jingïalehkai ka ban wan jong kane ka kynhun ïalehkai kaba na Eastern West Khasi Hills kan pynkhreh ïa ka jingïakhun pyrshah ïa ka Madhya Pradesh ha ka sngi Thohdieng (21 tarik mynta u bnai) ha Subroto Park Football Ground.
