Shillong, Nailar 19
Ka Lawsohtun SC bad ka Umlyngka SC ki la khur jingjop ha ka lympung ïalehkai 2nd Division Football League 2026 ba la pynïaid da ka Shillong Sports Association (SSA) ha ka sngi Balang.
Ha kane ka jingïakhun kaba la long ha SSA Stadium, ka Lawsohtun SC ka la pynjem khnap ïa ka Sohryngkham SC da 5-0 kol. U Sahame Lyngdoh (31 & 90+4) bad u Lamin Thangkhiew (42 & 47) ki la thep mar ar kol, katba ïa ka shi kol la thep da u Firstmoon Kharkongor ha ka minit kaba 50.
Haba phai sha kawei pat ka jingïakhun, ka Mawkriah West ka la shah rem da 0-4 kol ha ka Umlyngka SC. U Hamlet Thabah u la thep marwei ar kol ha ka minit kaba 16 & 63, katba ïa kiwei pat la pynbud da u Jollystar Hynñiewta (48) bad u Nichelson Lyngkhoi (75).
