Jowai, Nailar 19
Ka lympung ïalehkai 2nd Division ba la pynïaid da ka Thadlaskeiñ Sports Association ka la nangjam shaphrang ha ka sngi Balang ha madan Multi Sports Complex Wahïajer.
Ha ka jingïalehkai kaba nyngkong, ka Momer SC ka la pynliem noh ïa ka Mukhla Veterans da 1-0 kol bad kane ka la wan lyngba u Shain Chyrmang, uba la thep ha ka minit kaba 50.
Ha ka jingïalehkai kaba bud, ka Christian Club Namdong ka la jop da 1-0 kol ïa ka Moodop bad ïa kane ka shi kol la thep da u Starwell Sungoh ha ka minit kaba 26.
Haba phai sha kawei pat ka jingïalehkai, ka Thadmusem ka la pynrem noh ïa ka Mukhla Mission da 2-1. Ka Mukhla Mission ka la pynkhih jhar nyngkong tang mar ïasdang ka jingïalehkai lyngba u Wompher Phawa ha ka minit kaba 3, hynrei ka Thadmusem ka la pynphai kylla lyngba u Ebormi Mukhim ha ka minit kaba 17, kumjuh u Karmi Dkhar (59).
