Shillong, Nailar 19
Ka lahduh jong u snem ba la lah, ka NorthEast United FC ka la khmih lynti ban rung biang sha ka final ha ka sien kaba lai, ha kaba kan ïakhun pyrshah ïa ka Mohun Bagan Super Giant ha ka semi final kaba ar jong ka 135th Durand Cup ka ban long ha ka sngi Palei ha ka por 7 baje janmiet ha Jawaharlal Nehru Stadium, Shillong.
Ka NEUFC ka la khmih lynti ba kan bat biang ïa ka nam lahduh. Kane ka kynhun ka la rung sha ka semi-final kaba saw lynter jong ka Durand Cup hadien ba ka khur jingjop ha ka quarter-final pyrshah ïa ka Shillong Lajong FC da 5-2 kol. Watla ka la shah tam da 2-1 kol ha ka kylla step, hynrei ka la wan phai da ka jingjop ha ka kylla miet.
Katba ka Mohun Bagan ka la long ka klob kaba paw bha ha kane ka lympung ha kaba ka la rah ïa ka trophy nam lahduh haduh 17 sien.
Hadien ka jingïakhun kaba khlem shah rem bad khlem shah thep wat tang shi kol ha ka jingïalehkai group, kane ka kynhun kaba na Kolkata ka la jam sha sha ka quarter final. Hadien ba la ïakhaid mar 1-1 kol ha ka jingïakhun pyrshah ïa ka Jamshedpur FC, ka Mohun Bagan ka la lah ban khur jingjop lyngba ka tie-breaker da 9-8 kol bad kane la wan lyngba ka jingïalehkai bha u rangapkol u ), Vishal Kaith.
Ha kawei pat ka jingïalehkai semi final kaba nyngkong ha ka sngi Balang, ka East Bengal FC ka la pynliem noh ïa ka SC Delhi lyngba ka tie-breaker da 5-4 kol ha Vivekananda Yuba Bharati Krirangan bad ka la jam sha ka final.
