Shillong, Nailar 19
Ka Nangkiew Irat bad ka Nongkseh ki la mad ïa ka jingïakhaid da mar 1-1 kol ha ka lympung ïalehkai Shillong Premier League 2026, ba la long hynne ka nohphai sngi ha SSA Stadium, Polo.
Na bynta kane ka jing-ïakhun, ka Nangkiew Irat ka don artylli ki jingpynkylla ha ka thup ïalehkai jong ka, ha kaba u Yhoto Lohe bad u Wallam -suk Nongkhlaw ki la ïalehkai naduh kaba sdang ha ka jaka jong u Sangti Janai Shianglong bad u Shrikant Gadaba.
Katba na ka liang ka kynhun ïalehkai ka Nong-kseh, ka la pynkylla haduh 7 ngut ki rangïalehkai kaba kham bun na ki, ki dei ki rangïalehkai kiba kynsai kiba la ailad ba kin shong pynjah thait hadien ka jing -ïakhun ïa ka Durand Cup.
Ha ka jaka jong kine, ki rangïalehkai kiba la ïoh ban mihkhmat naduh kaba sdang ki long u Kynsai-lang Khongsit, Aenam G Jyrwa, Dawanchwa C Chal -lam, Banraplang Pyngrope, Kitboklang Pale, Darap-hun Talang bad Meban-khraw Wahlang, kiba la shong pat ki long u Ban-skhemlang Mawlong, Ban -pynkhrawnam Nong-khlaw, Sheen S Sohktung, Hardy Cliff Nongbri, Arlangky Nongsiej, Kyn-saibor Lhuid bad Guidle Syiemlieh.
Haba la shem bad ïohi ïa kine ki jingkylla marsien ïa sdang ka Nangkiew Irat ka la pyndonkam hok ïa kane ka kabu ba ka la ïoh ba kan da pynkhih jar nyngkong, ha kaba u Wallamsuk Nongkhlaw u la lah ban sam lyngba ïa ka ‘defend line’ jong ka Nongkseh bad ha ka por ba biang ban pyllait ïa ka bol sha u Jefferson Paskyntien, uba la lah pat ban pynpar lyngba ïa u Daraphun rangapkol ka Nongkseh ban pynkhih ïa ka jar ha ka minit kaba ar.
Hadien ba la shah tam shakhmat da shi kol, ka Nongkseh ka la pyrshang ba kan wanphai sha ka jingïakhun kaba hangne ka la sdang ban ïakhun tyngeh tad haduh ba kan da ïoh ruh ïa ki kabu ba kan shut ïa ki corner kum shi bynta ban ïoh ban pynphai noh shwa ïa ka shi kol ba la shah tam, hynrei ka kabu ksiar ba la mih paw ka wan lyngba u Kitboklang Pale uba la ïoh ïa ka kabu kaba paka ban pynkhih ïa ka jar ha ka minit kaba 33.
Ka kylla miet ka dei ka bynta ba ka Nongkseh ka la ïaleh ba kan ñion beit shakhmat, katba na ka liang ka Nangkiew Irat ruh, kim shim la duh mynsiem, da kaba ki la ïakhun tyngeh ban shah katba lah naka bynta ban ïakhaid na kane ka jingïakhun.
Hadien kane, ka suiñ bneng ruh kynsan ka la sdang ba kan kem dum bad ïa ki minit ba la pynjlan ïa ka jingïakhun, la hap ruh ban thang ïa ki floodlight, kaba hangne hi ka jingïakhun ka long kaba khluit bha, hynrei ha kaba kut ki ar kynhun ki la hun ka mynsiem ban shu ïa sam mar shi point.
Da kane ka jingïa-khaid, ka Nongkseh SSCC ka bat ïa ka kyrdan kaba ar hadien ba ka la ïoh ba kan khur 4 point, katba ka Nangkiew Irat ka la ïoh ban khur 1 point.
Ka jingïakhun ka ban wan kan dei ha ka sngi Thohdieng ha kaba ka Mawlai SC kan ïakhun pyrshah ïa ka Shillong Lajong FC ka ban long ha ka por 6 baje janmiet.
