Shillong, Nailar 19
Ka tnat ïalehkai ka Sorkar Pdeng kam shym la jer kyrteng ïa kino kino ki nongïalehkai ki ban ïoh ïa ka khusnam Major Dhyan Chand Khel Ratna Award, hynrei ha ka sngi Ba-ar ka la pynbna ïa ki 17 ngut ki nongïalehkai ki ban ïoh ïa ka khusnam Arjuna Award.
Ka khusnam ïalehkai ba ha khlieh duh jong ka ri India, kaba la sdang ha u snem 1991/92, kan ym don nongïoh na ka bynta jong u snem 2025 – tang ha ka sien kaba lai ha ka histori bad kaba nyngkong naduh u snem 2014.
Ka komiti jied ïa ki khusnam ïalehkai jong ka National Sports Awards, kaba la khlieh da u Justice (Retd) Arun Kumar Mishra, u nongbishar barim jong ka Supreme Court, ka la mynjur ïa ki jingai jingmut, bad hadien la phah ïa ki sha u Myntri ka tnat ïalehkai uDr. Mansukh Mandaviya na ka bynta ban ïoh ïa ka jingmynjur ba khatduh.
Kane ka jingpynmih khubor ka long hadien ba la bishar ïa ki lai tylli ki kyrteng- ka nongsiat khnam compound ka Jyothi Surekha bad ka kapten jong ka kynhun ïalehkai kriket jong ki kynthei India lem bad ka vice captain, ka Harmanpreet Kaur bad ka Smriti Mandhana, na ka bynta ka Khel Ratna, ha kaba ka komiti ka la ïakren ïa kita ki kyrteng ha ka jingïalang jong ka ha New Delhi ha u Nohprah jong u snem ba la lah.
Watla ki khubor ki la kam ba ïa ki kyrteng jong ki arngut ki nongïalehkai kriket kynthei la ïakren kham slam, hynrei ka jingbym don ka rukom ba kyrpang ban bishar bniah ïa ka jingïalehkai kriket ka la kylla long ka jingkhanglad. Kham bunsien ha kum kine ki khep, ka komiti ka shaniah ha ki jingpynrung kyrteng jong ka BCCI, bad kane ka synjuk kam shym la pynrung kyrteng na ka bynta kane ka khusnam ha u snem ba la dep.
U Mohammed Shami, u dei u rangïalehkai kriket ba khatduh eh ban ïoh ïa ka khusnam Khel Ratna, ryngkat ka khusnam pisa kaba T. 25 lak, ka medallion bad ka citation, ha u snem 2023.
Katba ym pat don kyrteng na ka bynta ka khusnam ba hakhmat eh, ka tnad ïalehkai ka la jied ïa ki 17 ngut ki nongïalehkai na ki jait jingïalehkai bapher bapher na ka bynta ka khusnam Arjuna namar ka jingtbit jong ki ha la ki jong ki jong ki jingïalehkai ha u snem ba la dep.
Ka thup kyrteng jong ki 17 ngut ki nongïalehkai ki ban ïohpdiang ïa ka khusnam Arjuna ki long u Tejaswin Shankar (Athletics), Muhammed Ajmal V (Athletics), Priyanka Goswami (Athletics), Treesa Jolly (Bad-minton), Pullela Gayatri Gopichand (Badminton), Narender (Boxing), Vidit Santosh Gujarathi (Chess), Divya Jitendra Deshmukh (Chess), Dhanush Srikanth (Deaf Shooter), Lalremsiami (Hockey), Rajkumar Pal (Hockey), Surjeet (Kabaddi), Pooja (Kabaddi), Rudransh Khandelwal (Para Shooting), Ekta Bhyan (Para-Athlete), Arvind Singh (Rowing) bad u Akhil Sheoran (Shooting)
Nalor kata, ka tnad ïalehkai ka la ai ruh ïa kawei ka khusnam Arjuna (lifetime) sha u rangïalehkai phutbol u I Arumainayagam.
Ha kawei pat ka liang, ki kyrteng jong ki coach ki ban ïohpdiang ïa ka khusnam Dronacharya ki long u Parveer Singh (Athletics), Chhote Lal Yadav (Boxing) bad ka coach shooting ka Neha Nandkumar Chavan.
Ka khusnam (lifetime) na ka bynta kiwei pat ki coach ki long u Dharmendra Singh Yadav (Boxing) bad u Virender Kumar (Wrestling).
