Shillong, Nailar 20
Ka lahduh jong u snem ba la lah, ka NorthEast United FC ka la kut noh ka jingïaid lynti ha ka lympung ïalehkai 135th Durand Cup, hadien ba ka mad ïa ka jingshah rem noh ha ka Mohun Bagan Super Giant lyngba ka tie-breaker da 4-3 kol ha ka sngi Palei ha Jawaharlal Nehru Stadium, Shillong.
Kane ka la wan urlong lyngba ka jingïalehkai bha u Vishal Kaith, uba la lah ban khanglad na ka jingshah thep ha kane ka jingïashut tie-breaker bad ban pynlong ïa ka Mohun Bagan ban jam sha ka final.
Te kumta ka Mohun Bagan kan pynkhreh ban ïaknieh ïa ka nam lahduh pyrshah ïa ka East Bengal ha ka sngi U Blei ha Vivekananda Yuba Bharati Krirangan, Kolkata.
Ha kane ka jingïakhun semi final baroh ar ki kynhun ki la pyrshang ban ïakhun tyngeh naduh kaba sdang. Watla hapdeng ka jingther u slap hashwa ban sdang kane ka jingïalehkai semi final, hynrei kine ki kynhun kim shym la kheiñ sting bad haduh kaba kut jong ka kylla step kim shym la lah ban thep kol.
Hadien ba la bteng ïa ka jingïakhun jong ka kylla miet, kine ki kynhun ki la pyrshang katba lah na ka bynta ban ïoh thep kol, hynrei haduh kaba kut ki 90 minit kim shym la lah ban pynurlong.
Te kumta na ka liang ki bor pynïaid ki la rai ban pynïashut noh da ka tie-breaker bad dei hangne ba ki rangïalehkai ka Mohun Bagan kim shym la pynlehnohei, katba ki ar ngut ki rangïalehkai ka NorthEast United kim shym la lah ban thep bad katei ka kynhun ba khlaiñ bor na Kolkata ka la khur ïa ka jingjop.
Kum ban shu pynkynmaw ha ka semi final kaba nyngkong ha ka sngi Balang, ka East Bengal FC ka la jop ïa ka SC Delhi lyngba ka tie-breaker da 5-4 kol.
