Shillong, Nailar 20
U Dawanchwa Carlos Challam bad u Kyrmenskhem Mukhim ki la long ki ar ngut napdeng ki 11 ngut kiba ïohpdiang ïa ka khusnam Emerging Players of the Durand Cup 2026.
U Dawanchwa uba ïalehkai na ka bynta ka Nongkseh bad u Kyrmen-skhem na ka bynta ka Langsning. Hynrei kine baroh ar ngut ki la ïoh ban mihkhmat ha ka sien kaba nyngkong eh ha ka Durand Cup bad ki la mihkhmat ïa katei ki klob ha ka Group-E hashwa ba ki kynhun jong ki kin shah rem noh ha ka jingïalehkai group.
Hynrei kine ki arngut ki la khring ïa ka khmat jong ki nongpynïaid, kiba la jied ban ithuh ïa ki na ki hynriew tylli ki kynhun na ka bynta ban ïohpdiang ïa ka khusnam Emerging Players ha kane ka lympung.
Baroh 11 ngut ki rangïalehkai kin ïohpdiang mar T. 1 lak tyngka. Nalor u Dawanchwa bad u Kyrmen, kiwei pat ki rangïalehkai ki long u Md Altab Hussain (South United FC) bad u Rinshid V (South United FC) na ka Group-A, Saikhom Borish Singh (Indian Army) bad u Veer Arjun Joshi (Samaleswari Sporting) na ka Group-B, Samuel K Vanlalpeka (Indian Air Force) bad u Naorem Somananda Singh (Indian Air Force) na ka Group C, Midul Doley (FC Raengdai) na ka Group-D, Rituraj Mohan (Bodoland FC) bad u Lalpekhlua (Karbi Anglong Morning Star FC) na ka Group-F.
U Kyrmenskhem u la long uba kynsai na ka bynta ka Langsning, ha kaba u la lah ban thep ar kol. Katba u Dawancha u la ïalehkai ha ka bynta kaba shapdeng na ka bynta ka Nongkseh da kaba thep ar kol bad ïarap pynbuh shi kol.
Lah ban pynpaw hangne, u Dawanchwa uba dang 26 snem u la long uba paw ha kiwei pat ki lympung kiba kham hashwa. U la shah jied ban ïohpdiang ïa ka nam Best Defender ha ka School Games Federation of India’s U-19 Football Tournament ha u snem 2018 bad u la ïalehkai na ka bynta kiba bun tylli ki klob, kynthup ïa ka Rangdajied United, Ryntih bad mynta na ka Nongkseh, ka Rebels ha Bangalore bad ka Peerless, ka Diamond Harbor bad ka United SC ha Kolkata. U la ïoh ruh ban mihkhmat ïa ka kynhun ïalehkai ka Jylla.
Ha kawei pat ka liang u Kyrmen u la long uba shyrkhei. Dei tang ha u snem 2025 ba u dang ïalehkai ha ka U-20 Fourth Division ba la pynïaid da ka Shillong Sports Association na ka Mawkasiang SC. Te kumta u la shah phaikhmat ha ka Langsning bad u la ïoh ban mih madan ïa kane ka klob ha ka Meghalaya State League, Shillong Premier League bad mynta ha ka Durand Cup.
