Shillong, Nailar 21
Ka East Bengal FC ka la pynpaw ïa ka jingtbit ha ka sngi Palei ha kaba ka la khur jingjop haduh 12-0 kol pyrshah ïa ka Rovers FC na Guam ha ka AFC Women’s Champions League 2026-27.
Kane ka kynhun jong ki kynthei ka la long ka jingjop kaba heh duh napdeng ki klob jong ka ri India ha kane ka lympung ïalehkai jong ka dewbah Asia, ha kaba ka la tam ïa ka kynhun jong ki shynrang (East Bengal) kaba la jop da 9-0 kol ïa ka Valencia kaba na Maldives ha ka Asian Club Championship jong ka aiom ïalehkai 1985-86.
Kane ka long ka jingjop kaba ar sien lynter na ka bynta ka East Bengal ha kane ka wat jong ka ‘preliminary stage’ ha kane ka lahduh jong ka Indian Women’s League ka dangsah sa shisien ïakhun ha kaba kan ïakynduh pyrshah ïa ka kynhun ïalehkai kaba Malaysia ka Sabah FA ha ka sngi U Blei na ka bynta ban jam sha kawei pat ka wat jingïakhun.
Ïa ki ar kol na ka bynta kane ka kynhun la thep da ka Priyangka Devi Naorem ha ka minit kaba 6′ bad 22′. Kumjuh ka Olivia Anokye (48′ & 58′) bad ka Abeka Opoku (64′ & 70′). Katba ïa ki shi kol la thep da ka Astam Oraon (15′), Abigail Antwi (49′), Shilky Devi Hemam (56′), Anju Chanu Kayenpaibam (73′) bad ka Soumya Guguloth (90+3′) na ka bynta ban khur syndon ïa ka jingjop.
Hadien ka jingjop da 4-0 kol ïa ka Rajshahi Stars FC na Bangladesh ha ka jingïalehkai kaba nyngkong, ka East Bengal mynta ka donkam sa kawei ka jingjop ha ka jingïakhun pyrshah ïa ka Sabah FA khnang ban nangjam sha kawei pat ka wat jingïakhun ha kane ka lympung.
