Shillong, Nailar 21
Ka Meghalaya Athletics Association (MAA) kan pynlong ïa ka lympung ïalehkai Meghalaya State Senior Athletics Championship 2026 naduh 14 haduh 16 tarik u Nailur ha SAI Training Centre, Shillong.
Ïa kane la kyrshan lang da ka tnat ïalehkai ka Sorkar Jylla, ha kaba ka long kaba kongsan na ka bynta baroh ki synjuk ïalehkai kiba la pynïasoh sha ka MAA ne ki bym pat pynïasoh, ba kin phah ïa ki nongïalehkai sha kane ka lympung.
Kat kum ka kyrwoh ba la pyllait da u General Secretary ka MAA Bah Finely Lad Pariat, la ong ba ka jingpynrung kyrteng na ka bynta ki nongshim bynta lyngba ki synjuk ïalehkai jong ki district kan long lyngba ka ‘Online’ ha ka website jong ka Athletic Federation of India (AFI) bad yn pdiang ïa kiba phah kyrteng shimet marwei. Kane ka jingpynrung kyrteng kan plie naduh 17 tarik mynta u bnai bad kan kut ha ka 31 tarik mynta u bnai.
Ka long kaba donkam ïa uwei pa uwei u nongïalehkai ban don ïa ka AFI UID (Aadhaar Card) kaba biang khnang ban lah ban ïashim bynta ha kane ka lympung. Ki nongshim bynta ki dei ban long kiba la kha ha lane shwa ka 30.03.2009.
Ki nongïakop ha kane ka lympung ki long 100Mts, 200Mts, 400Mts, 800Mts, 1500Mts, 5000Mts, 10000Mts, Long Jump, High Jump, Triple Jump, Javelin Throw (800g), Discus Throw (2.00kg), Shot Put (7.26kg), Hammer Throw (7.26kg), Half Marathon, 10000 Mts, Race Walk, 4 X 100M, 4X400M, 4X400M Mixed.
