Guhati, Nailar:
Ki pulit ka Assam ki la khanglad ïa ki 17 ngut ki briew ba la kynnoh ba ki dei ki nong Bangladesh ba rung shapoh ka jylla ha ka por mynstep jong ka 20 tarik Nailar, ong u Myntri Rangbah ka jylla u Himanta Biswa Sarma.
U Sarma u la ïathuh ba ïa katei ka kynhun la ithuh ha ka por ba pynlong ïa ka jingpynkhreh bad khanglad ban rung sha India. U la pynpaw biang ba ki briew kiba rung shapoh ka ri khlem ki kot ki sla kiba biang yn phah biang.
“No Kaagaz No Entry!” la ong u Sarma ha ka jingthoh ba la buh ha ka Social Media kaba mut ba ym shah ban rung lada ym don kot don sla. U la ong ba ka jylla kan dang plie ïa kito kiba rung beaiñ, hynrei “na ka bynta ki nongrung beaiñ, ka don tang kawei ka lad – BACK”.
U Myntri Rangbah um shym la batai bniah ïa ka jaka ba la khanglad ïa kitei ki 17 ngut ne shano la phah biang ïa ki. Ka Assam ka don ïa ka jaka talasi ba la pynïasohlang ha Sribhumi bad ha Land Custom Station ha Mankachar kaba don ha khappud India bad Bangladesh.
Ka sorkar Assam ka la pynpaw bunsien ba ka dang trei ban pynlong ïa ka jylla kaba lait na ka jingwan rung beain.
Ki pulit ki la pynlong ïa ka jingpahara kaba jur ha shilynter khappud ban ïada na ka jingwan rung khlem kot sha ka jylla.
Ki BSF ki la pynjur ruh ïa ka jingpahara ha shilynter ka khappud India bad Bangladesh kaba jngai kumba 1,885 km ha kane ka dong Shatei-Mihngi hadien ka jingkulmar ha Bangladesh ha u snem ba la dep.
Uwei u heh sorkar u la ong ba ki pulit Assam ki dang ap pahara bha ha shilynter khappud bad ki dang peit bniah ïa kiba rung beaiñ, ha kaba ïa kiba lap ba kim don ki kot ki sla kiba biang la pynphai biang.
