Shillong, Nailar 21
Ka Kajal Dhochak ka India ka la ïoh ban khur ïa ka nam lahduh kaba arsien lynter ha ka U-20 World Wrestling Championship da kaba pynliem ïa ka Jingru Sun ka China da 7-0 ha ka jingïakhun ban ïoh takma ksiar jong ki kynthei ha ka kyrdan jingkhia kaba 76 kg.
Katba ha ka jingïakhun kaba 72 kilo, ka Tanu Sharma ka India ka la buh ïa ka jingïakhun kaba tyngeh pyrshah ïa ka Chisato Yoshida ka Japan ha ka phainal hynrei ka la shah rem noh da 3-5 ha ka jingïaknieh ïa ka takma rupa.
Ha ka jingkhia kaba 62 kilo, ka Savita ka la ïoh noh tang da ka takma rupa hadien ba ka la shah rem ha ka Sakura Onishi ka Japan da ka jingbymlah ban ïalehkai bha, da 2-12.
Ha ka jingïakhun kaba 59 kilo, ka Komal kan ïakhun pyrshah ïa ka Rosa Molina Rodriguez na Spain.
Ki nongïalehkai Greco-Roman jong ka India ki la pyndep ïa ka jingïakop khlem da ïoh takma. Ka jingïalehkai freestyle jong ki shynrang kan sdang mynta ka sngi bad kan kut ha ka sngi U Blei.
