Shillong, Nailar 21
Ka Mawlai ka la bat ïa ka kyrdan ba nyngkong ha ka Shillong Premier League 2026 hadien ba ka la ïakhun tyngeh da ka jingïakhaid da 0-0 kol bad ka Shillong Lajong ha madan SSA Stadium hynne ka janmiet jong ka 21 tarik Nailar 2026.
Baroh ar tylli ki team ki la jop ha ki jingïalehkai ba nyngkong jong ki. Ka Lajong ka la jop da 1-0 kol pyrshah ïa ka Nangkiew Irat ha ka 29 tarik u Naitung katba ka Mawlai ka la kiew sha ka jingjop kaba 5-0 kol pyrshah ïa ka Laitkor ha ka sngi kaba bud ha kaba ka long ka jingjop kaba khraw tam ha kane ka samoi ïalehkai.
Ka Mawlai bad ka Lajong ki la pyni ïa ki jingïalehkai kiba sah jingkynmaw bad kiba don jingmut bha ha ka SPL ha kine ki snem ba la dep, kum ka jingjop kaba phylla jong ka Lajong ha u snem ba la dep da 4-3 kol bad ka jingïalehkai kaba pynkut ïa ka samoi 2024 ha kaba ka SLFC ka la ïoh ïa ka khusnam SPL kaba san da ka jingjop kaba 2-1 kol.
Ka Mawlai ka la wanrah tang kawei ka jingkylla na ka jingjop jong ka pyrshah ïa ka Laitkor, ha kaba u Lovingstar Suting u la wan ban ïakhun na ka bynta u Samlang Rympei. Na ka liang jong ka Lajong ka la don lai tylli ki jingkylla, ha kaba ka la pynrung ïa u Badondor Marbaniang, u Freddy Jyrwa bad u Banshanskhem Kharsyntiew sha ka thup ba sdang katba ka la weng noh ïa u Emanbha Marbaniang, u Rimankhraw Kharumnuid bad u Lakpa Lama.
Ka Mawlai ka long kaba shyrkhei tam ha ka jingïakhun pyrshah bad ka la poi hajan eh ban thep kol ha ka minit kaba 30 ha kaba u Lovinstar Suting u la beh ïa ka bol sha kol hynrei ïa ka bol la pynlait noh na u lain da u Mebanaibok Kharbudnah ka SLFC.
Ka Lajong ka la don ki lad ki kabu ha ka kylla miet ruh, ha kaba u Abelson Jachi u la ïoh ban pyrshang ban thep kol da ka ‘half volley’ ha ka minit kaba 20. Nangta u Deibormame Tongper u la ioh ka lad ïa ka Lajong ban pynlamkhmat hynrei kam shym la lah pynurlong bad poi shano shano ruh.
Ka kylla miet ka la long kaba stet bha, da kaba don ka jingïalehkai ha baroh arliang jong ka madan. U Robertson Khongriah u la ïaid tang palat ïa ka crossbar ha ka minit kaba 53 na ka bynta ka Mawlai bad u paralok jong u u Basuklang Bina u la shah khanglad noh ha u rangïalehkai shadien ba stet ban pynlait ïa ka kol ha ka minit kaba 62.
Na ka bynta ka Lajong, u Lalmuansanga uba la bujli u la pyrshang ban thep da ka khlieh ïa ka free-kick ha ka minit kaba 81 bad u Galbraith Laitmon u la pyrshang biang sa kawei ka jingpyrshang thep kol kaba sa tang katto katne minit shuwa ba ka jingïalehkai kan kut noh.
Kane ka dei ka jingïalehkai kaba khatduh jong ka wat kaba ar jong ka SPL 2026. Ki don saw tylli ki kynhun kiba kamai mar 4 poiñ hynrei ka Mawlai ka don ïa ka jingïapher kol kaba bha tam (+5) bad kumta ka long kaba nyngkong. Ki lai tylli ki kynhun kiba bud baroh ki don ka jingïapher kol kaba long tang kumba +1, kumta ki kol ba la thep ki wan ha ka jingïalehkai, ha kaba ka Meghalaya Police (3) ka lamkhmat ïa ka Nongkseh (2) bad nangta sa ka Lajong (1).
Lashai ka sngi ka lahduh barim ka Langsning kan ïakhun pyrshah ïa ka Rangdajied United ha ka por 6 baje janmiet ha ka jingïakhun ba nyngkong jong ka Round 3. Ka Langsning ka ïoh 3 poiñ bad ka Rangdajied 1 poiñ hynrei baroh ar ki la shah rem ha ka jingïakhun kaba dang shen.
