Shillong, Nailar 21
Ka All India Football Federation (AIFF) ha ryngkat ki klob, ki la pynthikna ïa ka jingshim bynta ha ka Indian Super League 2026-27 ha kaba yn ïaid beit shakhmat da 13 tylli ki kynhun bad yn pynïalehkai ha ki ar tylli ki wat (ha ïing bad shabar).
Ïa kane ka lympung yn sa pynbna noh shen ha kaba ïadei bad ka tarik ban sdang ïa ka bad kumjuh ka prokram ïalehkai jong kane ka lympung.
“Ngi sngewkmen ïa ka jingdon ki kynhun ki ban shim bynta ha kane ka aïom. Kane kan plie lad ïa ngi ban pyrkhat na ka bynta ki prokram ïalehkai jong kane ka lympung,” la pynpaw ki nongmikhmat na ki klob.
Lah ban kdew ha u bnai ba la lah, ka Jamshedpur FC ka la pynbna ba kan weng noh ka jingshim bynta ha ka ISL naduh kaba sdang jong ka aïom ïalehkai 2026-27. Ïa kane ka rai la pynthikna da ka Jamshedpur Football and Sporting Private Limited (JFSPL), kaba la la long trai ïa ka Tata Steel bad kaba pynïaid ïa kane ka klob.
Na ka liang ka JFSPL ka la pynskhem ïa ka jingbteng jong ka ban kyntiew ïa ka phutbol ha India watla ka klob ka la mih noh na ka lympung ïalehkai. “Ka JFSPL ka dangïai bteng, ha kiwei pat ki bynta, ha ka jingbteng ban kiew bad kyntiew ïa ka phutbol ha India. Ngin sa bteng ha ka jingpyrshang jong ngi ban kyntiew ïa ka jingïalehkai phutbol, kynthup naduh ki kyrdan kiba dangrit. Ngin bteng ban ithuh bad kyntiew ïa ki samla ba don sap ha ka phutbol ha kylleng ka ri India ban thaw lad na ka bynta ki nongïalehkai phutbol hapoh ka ri bad shabar ri,” la pynpaw katkum ka kyrwoh.
Ïa ka Jamshedpur FC la seng naduh ba la pynlong nyngkong ïa ka ISL ha u snem 2017.
Kine ki 13 tylli ki klob ki kynthup lang ïa ka Churchill Brothers kaba la mih bujli ha ka jaka ka Jamshedpur FC hadien ba ka la lah ban siew dep ïa ka jingsiew kaba ar (second instalment) ha ka 14 tarik u Nailar. Ka Diamond Harbour ka la long ka klob kaba duh rung sha kane ka lympung na ka daw ba kam shym la lah ban siew dep ïa ka pisa kaba sah, watla ka la long ka lahduh ha ka IFL jong ka aïom ba la lah.
