Shillong, Nailar 23
Ka Little Star English Medium Higher Secondary School ka la shah rem noh ha ka NCC kaba na Mizoram da 6-0 kol, ha ka jingïalehkai quarter final ha ka sngi U Blei bad kane ka jingïaid lynti jong ka ha ka 65th Subroto Cup International Football Tournament 2026, ka la poi sha kaba kut.
Watla kane ka kynhun ka la lah ban pyni ïa ka sap ïalehkai bha ha ka Pool-D jong kane ka lympung, hynrei ha ka sngi U Blei ka la shah rem noh ha ka NCC ha Subroto Park Football Ground kaba ha New Delhi.
Kat kum ka jingpynpaw da u coach kane ka kynhun u Bah Shemphanglut Lyngdoh Mawphlang, u la ïathuh ba ki ‘thei ïalehkai ka Jylla ki la pyrshang ban ïalehkai naduh kaba sdang watla ki long kiba duna ha ka rynïeng haba ïanuor bad ki ‘thei ïalehkai na Mizoram kaba kham jrong bad kiba long shisha kiba tbit ha ka rukom ïalehkai.
“Watla ngi la shah rem ha kane ka jingïakhun quarter final, hynrei ngin ym duh jingkyrmen namar shisien ka sngi ngin sa wanphai biang sha kane ka lympung da ka jingjop bad kane kan shong ha ka jingtrei shitom lang da ki khynnah ïalehkai lem bad ki bor pynïaid jong ka skul,” u la bynrap.
Lah ban kdew ha ka jingïalehkai jong ka Pool-D, katei ka kynhun na Eastern West Khasi Hills kaba la mihkhmat ïa ka Jylla, ka la lah ban ïalehkai bha naduh kaba sdang ha kaba ka la jop ïa ka Chandigarh da 2-0 kol, kumjuh ïa ka ISSO da 8-0 kol, ïa ka Madhya Pradesh da 2-1 kol bad ïa ka DNH&DD da 8-0 kol.
Kumba ka long mynta ka Jylla ka dangsah sa ar tylli ki kynhun jong ki shynrang ki ban shim bynta ha kane ka lympung, kiba kynthup ïa ka North Liberty HSS (U-15 Boys) bad ka OM Roy Memorial HSS (U-17 Boys).
Ïa ka Under-15 Boys, yn pynlong ha Bengaluru bad ïa ka Under-17 Boys & Girls yn pynlong ha nongbah Delhi.
