Aizawl, Nailar:
Ki la don kumba 5 ngut ki briew, kiba la shahkem ha Mamit distrik jong ka Mizoram, halor ka jingkynnoh ba ki kit ïa ki 45 tylli ki sniang, kiba ïoh ïa ka jingpang African Swine Fever (ASF) na Assam sha Aizawl, la ïathuh ki heh sorkar ha ka 20 tarik, Nailar.
La kynnoh ba kitei ki nongkit ki la ïaid lait ïa ka jaka talasi mrad ha Zawlnuam kaba don harud khappud Mizoram-Assam shwa ba kin shah khanglad ha ka shnong Zamuang, la ïathuh u heh jong ka Animal Husbandry and Veterinary Department.
Ki doktor mrad hadien ki la leh ïa ki test ïa ki sniang bad ki la pynthikna ba ki ïoh ïa ka jingpang ASF, ka jingpang kaba saphriang bha kaba ktah ïa ki sniang ba ri ha ïing bad ki sniang khlaw. Hadien kata la pynïakhlad noh ïa ki mrad katkum ka aiñ, la ong u heh sorkar.
