Shillong, Nailar 23
Ka Langsning FC ka la sei ïa ka buit ïalehkai kaba kampher na ka bynta ban pynliem ïa ka Rangdajied United FC da 3-1 kol ha ka jingïakhun jong ka kylla kaba lai jong ka Shillong Premier League, ha ka sngi Saitjaiñ ha SSA Stadium, Polo.
Watla ka Rangdajied United FC ka la tam sha -khmat da shi kol ba la thep da u Franky Dkhar (25′), pynban ka Langsning FC ka la ïoh ïa ki kabu kiba paka hashwa ban kut ka jingïalehkai jong ka kylla step lyngba u Mebanshngaiñ Kurkalang (45’+3) bad ïa kiba sah ka la thep ha ka kylla miet lyngba u Syed Ahmed (65′) bad u Rohan Manar (88′).
Ha kane ka jingïaid lynti ka Langsning FC ha kane ka aïom ïalehkai mynta ha ka SPL ka la sdang da ka jingjop ïa ka Sawmer, hynrei ban shah liem noh pat ha ka MLP F.T, katba na ka liang ka Rangdajied United, ka la lah ban sdang shwa da ka jingïakhaid bad ka MLP F.T, hynrei ka la shah rem pat ha ka Saw-mer ha ka jingïakhun kaba bud.
Ki jingkylla kaba ki coach jong ki ar kynhun ki wanrah na ka bynta kane ka jingïakhun ka long ba u Bah Khlaiñ Pyrkhat Syiem -lieh (Coach ka Lang-sninhg FC) ka long ba u la pynrung biang ïa u Rajat Paul Lyngdoh, Kyrmen-skhem Mukhim bad u Denelson Pyngrope ha ka jaka u Nister Roy Suting, Apborlang Kurbah bad u Samuel Phawa.
Katba na ka liang u Bah Aibanjop Shadap (Coach ka Rangdajied United) u pynrung ha ka thup ïalehkai haduh san ngut ki rangïalehkai ha kaba Bantiplang Khong-noh, Mebannangkiew Tha -bah, Freelyson Tariang, Elnathan D Wahlang bad Eijingmut Dkhar ki la mihplie ha ka jaka u RT Hanson Pdang, Ronald Kharkongor, Dameki Khongstia, Pasborlang Khonglikong bad Khaiñ-kupar Ïawphniaw.
Haba phai sha ka jingïakhun pat, baroh ar kynhun ki la ïakhun tyngeh ha baroh ki 90 minit, namar ba ki sngewthuh ba ka lympung ïalehkai kaba tang shi kylla, ka jinglah ban khur ïa ka jingjop, ka long beit kaba donkam bha ïa ki ban ïaknieh na ka bynta ban khur ïa ka lai poiñ.
Ka jingïalehkai ha ka lah sngi U Blei kan long hapdeng ka Meghalaya Police F.T pyrshah ïa ka Sawmer SC ha ka por 3:40 nohphai sngi.
