Shillong, Nailar 24
Ka Meghalaya Police F.T ka la bteng biang ïa ka jingkop kaba ar ha ka Shillong Premier League 2026 ba la pynïaid da ka Shillong Sports Associa-tion (SSA), hadien ba ka la pynliem noh ïa ka Sawmer SC da 4-2 kol ha lah sngi U Blei ha SSA Stadium, Polo.
Haba phai sha ka jingthep ïa ki kol, na ka bynta ka Sawmer la thep da u Diego Khyriem (2′) bad u Banteilang Lyngdoh (11′), katba na ka liang ka MLP la thep da u Pyn-shaidor Nongrang (5′), Rapborlang Marweiñ (15′), Bikram Chettri (67′) bad u Pynshailang L. Lyngkhoi (84′).
Kine ki ar tylli ki kynhun ki la rung sha kane ka jingïakhun, hadien ka jinglah ban khur ïa la ki nam jop, ha kaba ka Sawmer SC ka la jop da 2-1 kol ïa ka Rangdajied United FC, katba ka MLP FT ka pynliem ïa ka Langsning FC da 2-1 kol.
Kumba ka paw ka MLP FT ka la shaniah skhem ha ka juh ka kynhun, kaba la khur jingjop ha ka jingïalehkai ba la lah, katba ka Sawmer SC ka jingkylla ka long ba lai ngut ki rangïalehkai, u Diego A Khyriem, Enestar Malngiang bad u Michaelson Kurbah ki la mih bujli ha ka jaka u Oresterwell Langshiang, Andy Z Mawthoh bad Wanshanlang Dkhar.
Ka jingïakhun hi ka long ba marsien ïa sdang katta haduh 15 minit eiei, la ïohi ïa ka jingkhih jar kaba haduh saw sien, ha kaba ki ar kynhun ki la ïakhun tyngeh ban ïa thep marbud ïa ki kol, kaba ki la shah thep, bad ka kylla step hi ka long ba ki ar kynhun ki la ïakhaid da 2-2 kol.
Haba wan bteng ïa ka kylla miet, ka MLP ka la sdang ban ñion shakhmat ha ka rukom ïalehkai jong ka, ha kaba hangne ka pynlong ïa ka Sawmer SC ba kan hap ban kham randien ka rukom ïalehkai jong ka, pynban ha kaba kut, ka MLP ka la bteng ban jam shakhmat na ka bynta ban thep sa ar kol na ka bynta ban khur ïa ka lai poiñ.
Ha ka sngi Ba-ar ka jingïalehkai kan long hapdeng ka Laitkor SC pyrshah ïa ka Nangkiew Irat ha ka por 3:40 baje nohphai sngi. Ka Laitkor SC ka la 3 point na ki arsien ïakhun, katba ka Nangkiew Irat ka la khur tang shi point. Te kumta kine ki kynhun ki donkam ban ïakhun tyngeh na ka bynta ban khur ïa ka jingjop.
