Shillong, Nailar 24
Ka Meghalaya Arm Wrestling Association (MAWA) ka la sdang ban jied ïa ki rang bad ki ‘thei ïalehkai ïakhun kti ki ban ïa aireng ha ka 39th National Games 2027 ka ban long ha jylla Meghalaya, kaba la buh ban sdang naduh u Lber jong u snem ban wan.
Ha kane ka jingjied ïa ki nongïalehkai kaba la pynlong ha Indoor Hall ha Malki, la wan ïashim bynta da ki spah ngut ki rang bad ki ‘thei ïalehkai na ki klob bad ki gym bapher bapher jong ka Jylla.
Kaba itynnad ka long ba ki samla bad ki nongïalehkai na baroh ka district kiba kythup naduh Jaiñtia bad Garo, ki la wan ban shim bynta da ka jingkhmih lynti ban ïohlad ha ka ban mihkhmat ha ka National Games.
Ki nongïalehkai ha la ki jong ki kyrdan ïalehkai ki la lah ban sei ïa ki sap ïalehkai jong ki ha kane ka jingïakhun kti.
U Bah Junestar Kharbuli, President ka MAWA, u la ïathuh ba ka jingpynlong ïa kane ka jingjied nongïalehkai ka long ban ailad ïa ki samla ban mih shakhmat ban pyni ïa ka sap ïalehkai jong ki bad ban ïohlad ruh ha ka ban ïakhun ha ki rynsan ïalehkai kiba heh.
“Ha ka jingshisha ka arm wrestling kan pat ïoh rung ha ka Olympic, hynrei jait ba ka National Games kan long ha kane ka Jylla. Te kumta ngi la ïoh ka jingbthah na ka tnat ïalehkai jong ka Sorkar Jylla ba ngin hap ban pynbiang lypa ïa baroh ki jingdonkam khnang ban ngin ïoh ban shim bynta ha katei ka lympung kaba heh hapoh ka ri,” u la bynrap.
U la ong ba ha ka jingïaid lynti jong u, u ïohi ba bun ki samla bad ki rangbah ki don ïa ka sap ïakhun kti, hynrei kim ïoh ïa ka lad ban pyni ïa ki sap ki jong ki. Kumta da kane ka rynsan, ki la ïoh ban wan shakhmat, bad ban pyni shisha ba ki long kiba tbit bad ki la khmih lynti ban wanrah nam bad burom ïa ka Jylla ha ka National Games ka ban long ha u snem ban wan.
