Shillong, Nailar 24
Ka lympung ïalehkai 2nd Division Football League 2026 ba la pynïaid da ka Shillong Sports Association ka la nangjam shaphrang ha ka sngi Ba-ar, ha kaba ka Mawpat SC bad ka Umphrup SC ki la khur jingjop.
Ha kane ka jingïakhun kaba la long ha SSA Stadium Polo, ka Mawpat ka la pynliem noh ïa ka Nongrah SC. Kane ka la wan urlong lyngba ki kol ba la thep da u Donboklang Lyngdoh ha ka minit kaba 44 bad u Arnisius Marweiñ (76).
Haba phai sha kawei pat ka jingïakhun kaba la long ha madan MFA, ka Umphrup SC ka la jop da 4-1 kol ïa ka Mawkriah West SC.
Ha ka kylla step ka Umphrup ka la thep shi kol lyngba u Nangkhrawkupar Kharumnuid ha ka minit kaba 42. Hynrei kane ka kynhun ka la thep biang sa lai kol ha ka kylla miet lyngba u Nangpynkhraw Kshiar (81) bad ïa kiwei pat da u Batkular Mawthoh (85 & 89). Na ka liang ka Mawkriah West ka la pynphai kylla shi kol lyngba u Kyrshanborlang Rangdkhew (68) hashwa ba kan mad ïa ka jingshah rem.
Ha ka sngi Ba-ar ka jingïalehkai kan long hapdeng ka Mawryngkneng SC pyrshah ïa ka Smit SC ha ka por 12:30 mynsngi ha SSA Stadium, katba ka madan MFA yn ïakynduh ka Umlyngka SC pyrshah ïa ka Nongmynsong SC ha ka por 3:30 nohphai sngi.
