Jowai, Nailar 24
Ka FC Myntoilang Bamkamar ka la pynliem noh ïa ka Hunlang FC Rakabah da 1-0 kol na ka bynta ban khur jingjop ha ka lympung ïalehkai 2nd Division ba la pynïaid da ka Thadlaskeiñ Sports Association (TSA) ha ka lah sngi U Blei ha Multi Sports Complex kaba ha Wahiajer.
Kane ka nam jop ka la wan urlong lyngba ka shi kol ba la thep da u Isaiah Suting ha ka minit kaba 16.
Ha ka jingïalehkai kaba bud, ka Lummuriap SC ka la pynliem noh ïa ka Ïawpynsin Wahïajer da 4-2 kol. U Chibor Ryngkhlem u la thep marwei ar kol ha ka minit kaba 56 & 60, katba ïa kiwei pat ki kol ba la kham hashwa la thep da u Alanroy Nongrum (1) bad u Nangtei Synrem (30) na ka bynta ka ka Lummuriap. Na ka liang ka Ïawpynsin Wahïajer ka la pynpha kylla ar kol da u Hoshen Lyngdoh (20), bad u Hoping-stone S. Manner (36).
Haba phai sha kawei pat ka jingïalehkai kaba khatduh hapdeng ka Modymmai SC bad ka Maitchaphrang FC ki la ïakhaid mar 1-1 kol. Ka Modymmai ka la pynkhih jar nyngkong eh lyngba u John Slong (38), hynrei ka Maitchaphrang FC ka la pynïakhaid kylla lyngba u Marbait Nongpluh (46).
