Khliehriat, Nailar 24
Ka Ryntihlang SC Brishyrnot ka la khur jingjop, katba ka Umlyngsha YSSC, Khliehriat West FC, Ïapmala United FC bad ka SWO Moosianglamare Old SC ki la ïasam mar shi poiñ ha ka 2nd Division Football Tournament ba la pynïaid da ka East Jaiñtia Hills District Football Association.
Ha kane ka jingïalehkai kaba la long ha ka lah sngi U Blei ha madan artificial turf Diengshynrum kaba ha Khliehriat, ka Ryntihlang SC Brishyrnot ka la pynliem noh ïa ka Rangad SCSC da 2-1 kol.
Ïa ki kol na ka Ryntihlang la thep da u Hamedabiang Bamon ha ka minit kaba 33 bad u Yomioo Syih (35), katba ka Rangad ka la pynphai kylla shi kol lyngba u Sunday Tariang PK (40+1).
Ha kawei pat ka jingïalehkai kaba bud hapdeng ka Umlyngsha YSSC bad Khliehriat West FC ki la ïakhaid mar 2-2 kol. Na ka bynta ka Umlyngsha la thep da u One Enjoy Dkhar (40+2), bad u Kamni Rupsi (43), katba ïa ka Khliehriat West la thep da u Owenson Malang (13) bad u Niki o Nongtdu (48).
Ha ka jingïalehkai kaba lai hapdeng ka Ïapmala United FC bad ka SWO Moosianglamare Old SC ki la ïakhaid mar 3-3 kol. Ïa ki kol na ka bynta ka Ïapmala United la thep da u Arly Lamo (9), Iaslang Lamo (46) bad u Shining Rymbai (74), katba ïa ka SWO Moosianglamare Old SC la thep da u Evening Lapasam PN (22), Premio Muksor (38) bad u Pynïar Pusein (55).
