Shillong, Nailar 25
Ka Chelsea ka la sdang khie im biang hapoh ka jingïalam u coach bathymmai u Xabi Alonso ha kaba ka la khur jingjop da 3-2 kol pyrshah ïa ka Fulham ha ka Premier League ha ka sngi Ba-ar.
Kane ka nam jop ka la wan urlong lyngba ki kol ba la thep da u Joao Pedro, Morgan Rogers bad u Cole Palmer.
Ka jingïalehkai kaba nyngkong jong ka Chelsea ha kane ka samoi ka la sdang da ka jingïalehkai bha ha kaba u Palmer uba la wanphai biang sha kane ka lympung hadien ka jingmynsaw ha ka samoi ba la dep, u la pynbuh bol na ka bynta u Joao Pedro, bad une u rangïalehkai na Brazil um shym la pynlehnohei ïa kane ka kabu ksiar kaba u la ïoh ha ki 31 sekhon, tang mar ïasdang ka jingïalehkai bad u rangapkol a liang pyrshah u Bernd Leno um shym la lah ban leh eiei.
Ka Fulham ka la pynïakhaid kylla lyngba u Josh King ha kaba u rangapkl u Robert Sanchez um shym la lah ban khanglad ha ka minit kaba 24 bad ban pynïoh jingkyrmen ïa kane ka kynhun ha la ïing.
Hynrei ki arngut na ki rangïalehkai kiba dangdep soi thymmai jong ka Chelsea ki la ïasoh lang ha ka minit kaba 41 haba u rangïalehkai ‘dien u Maxence Lacroix u la pynkhih ïa ka bol sha ka liang ka diang hashwa ban pynbud bol na ka bynta u Rogers, u bym shym la pynlehnohei ïa kane kabu ksiar.
Saw minit hadien ba la bteng ïa ka kylla miet, u Joao Pedro u la ïarap ban pynbud bol na ka bynta u Palmer, uba la shut ïa ka bol bad ka la leit dei nakjat u Leno bad ka la rung hi jlang.
“Ka la long ka samoi ïalehkai kaba eh bha ryngkat bad ki jingmynsaw bad kiwei kiwei ki jingeh, hynrei lyngba ka aïom lyiur bad naduh ba nga la wanphai nga la trei shitom,” la pynpaw u Palmer.
“Ha ka jingshisha ngi don napdeng ki para nongïalehkai kiba mynsaw, hynrei nga la pyrshang ban ïalehkai bha bad ban trei shitom bha man ka sngi.”
U Gonzalo Garcia jong ka Fulham, ha ka jingïalehkai ba nyngkong jong u hadien ba u la soi ïa ka kontrak kaba thymmai naduh ba u la mih noh na ka Real Madrid, u la ai jingkyrmen ïa ki nongpynïaid kane ka klob hadien ba u Sanchez u la lah tang ban khanglad ïa ka bol kaba la pyrshang da u Timothy Castagne ha ka minit kaba 54.
Hadien ka Fulham ka la ïoh ïa ka kabu kaba biang eh ban pynïakhaid lyngba u Antonee Robinson ha ka minit kaba 78, hynrei ka bol kaba u la shut ka la her shabar jong ka kol. Te kumta ha kaba kut ka Chelsea ka la khur ei ïa ki lai poiñ.
