Shillong, Nailar 25
Ka East Zone ka la pynliem noh ïa ka North East Zone da ka inning bad 210 run ha ka sngi kaba lai jong ka lympung ïalehkai Duleep Trophy, ha ka sngi Ba-ar ha Bengaluru.
Ki la don lai ngut ki rangïalehkai na kane ka jylla Meghalaya kiba la mihkhmat ïa katei ka kynhun jong ka North East Zone kiba kynthup ïa u Kishan Lyngdoh, Akash K Choudhary bad u Arpit Bhatewara.
Ka jingïalehkai pyrshah ïa ka kynhun jong ka East Zone ryngkat bad ki rangïalehkai ba la tbit kum u Mohammed Shami bad u Vaibhav Sooryavanshi, ka long kaba eh ïa ka North East Zone ban ïakhun pyrshah. Haba shimti ïa ka jingtied kaba nyngkong, ka East Zone ka la kamai 467 run bad shah pynkhyllem baroh ki nongtied bad hadien kata ka la kawang bol arsien ïa ka NE Zone na ka bynta 111 bad 146 run.
Ha kawei na ka inning ha kaba u la ïoh ban tied, u Akash u la pyrshang ban ïalehkai bha na ka bynta ka NE Zone, ha kaba u la ïoh 3/102 ha ki 26 over. Katba u Arpit u la khur shi wiket.
Ha ka liang ka jingtied, u Arpit u la kamai 32 ha ka jingïalehkai ba nyngkong jong u, kaba kynthup ïa saw tylli ki ‘four’. Katba u Kishan u la shah pynkhyllem noh hadien ba u la tied 9 run ha ka kylla kaba nyngkong, hynrei u la lah ban kamai 25 ron ha ka wat kaba ar. Katba u Akash u la ïoh 27 run hadien ba u la wan kum u nongtied uba shiphew.
