Mawkyrwat, Nailar 25
36 ngut ki nongïalehkai kiba la shah jied ha ka South West Khasi Hills District Badminton Association ban mihkhmat ïa ka district sha ka 41st State Badminton Championship 2026, ka ban long naduh ka sngi Balang haduh 29 tarik mynta u bnai ha Nongstoiñ, West Khasi Hills District.
Kine ki 36 ngut ki nongïalehkai ki la shah jied hadien ka jingïalehkai bha bad ka jinglah jong ki ban pyni ïa ki sap ba ki don kaba la pynlong dangshen da ka synjuk bad kine kin mih mynta ka sngi na la ka jong ka distrik ban leit ïashim bynta ha kane ka lympung ïalehkai ka ban long ha Nongstoiñ.
Kum ka dak jong ka jingaimynsiem bad kyrkhu kyrdon ïa ki nongïalehkai, ka South West Khasi Hills District Badminton Associa-tion ka la pynlong ïa ka jingïalang ba lyngkot ha Hall jong u Block Development Officer, Mawkyrwat C&RD Block.
Ka synjuk ka la ai mynsiem bad kitbok kitrwiang ïa baroh ki nongïalehkai, da kaba kyrmen ba kin ïalehkai bha bad kin lah ban pynpaw ïa ki sap bad ki buit ïalehkai jong ki, khnang ban wanrah nam bad burom ïa ka South West Khasi Hills District ha katei ka lympung.
Ha kane ka jingïalang la donlang u Bah Elbok Wanñiang, Vice Chairman jong ka SWKHDBA, u Bah Tidy Wahlang, General Secretary, ryngkat bad kiwei ki nongkitkam jong ka synjuk, ki kmie ki kpa jong ki nongïalehkai bad kitei ki nongïalehkai kiba la shah jied.
