Jowai, Nailar 25
Ka Laru SC bad ka Shiparalok FC Umladang ki la khur jingjop ha ka lympung ïalehkai Second Division Football League ba la pynïaid da ka Thadlaskeiñ Sports Association (TSA) ha ka sngi Ba-ar ha madan Multi Sports Complex kaba ha Wahïajer.
Ha ka jingïalehkai kaba nyngkong, ka Laru SC ka la pynliem noh ïa ka Maya SC Wahïajer da 4-1 kol.
Tang mar ïasdang ka jingïalehkai, ka Laru ka la pynkhih jar nyngkong eh lyngba u Army Tamu ha ka minit kaba 2, hynrei hadien katto katne por ka Maya SC Wahïajer ka la pynphai kylla lyngba u Bunki Lyngdoh (21).
Hashwa ban kut ka jingïalehkai jong ka kylla step, ka Laru ka la thep biang sa ar kol lyngba u Lumlang Mukhim (25) bad u Raplang Dkhar (39) na ka bynta ban tam da 3-0 kol. Hadien ba la bteng ïa ka kylla miet u Army (56) u la thep biang sa shi kol na ka bynta ban pynlong ïa ka Laru ban khur syndon ïa ka jingjop.
Ha ka jingïalehkai kaba bud, ka Shiparalok FC Umladang ka la jop da 2-0 kol ïa ka Tympang SC Wahïajer. Ïa kine la thep da u Shanbor Lawai ha ka minit kaba 2 bad u Teilang Ryngkhlem (58).
Kane ka lympung ka bteng biang ha ka sngi Balang ha kaba ka Niriang SC kan ïakhun pyrshah ïa ka Unity SC Phlongingkhaw ha ka por 10 baje mynstep, kumjuh ha ka 12 baje mynsngi ka Tympang Club Iongshiwiat ïa ka Momer SC bad ha ka por 2 baje nohphai sngi ka Hunlang FC Lumkynter pyrshah ïa ka Moodop SC.
