Itanagar, Nailar:
Ka kynhun khañi khynnah kaba treikam ha Arunachal Pradesh ka la shah kem hadien ba ki pulit ki la ïoh ban pyllait im ïa 19 ngut ki khynnah na ki jaka bapher bapher jong ka jylla bad kem ïa lai ngut ki briew halor ka jingkynnoh ba ki donkti ha ka jingkhaïi ïa ki khynnah, la ïathuh ki pulit ha ka sngi Ba-ar.
Kitei ki briew kiba la shah kem ki dei kiba la tip kyrteng kum u Gumnya Kochung, u Marte Ete bad u Neha Gerory.
Katkum ka jingïathuh ka tyllong khubor la ong ba ïa kine ki khynnah la ïoh ban pyllait na Mechuka, Aalo, Pasighat, Naharlagun, Itanagar bad na Longding kaba don ha Arunachal Pradesh.
Ïa kane ka jingpyllait im la sdang hadien ka jingujor ba la ujor da ka Namsai Child Welfare Committee (CWC). Da kaba pynshong nongrim ha katei ka jingujor, la buh ïa ka jingmudui ha thanad ha ka 17 tarik u Nailar.
Ka jingtohkit jong ki pulit ka la lap ba ka jingpynïaid pisa kaba sdang naduh kumba 10 hajar haduh 50 hajar tyngka na ka bynta uwei u khynnah ka la jia ha ki katto katne ki khep.
“Ngi la pyllait im ïa 19 ngut ki khynnah ha kylleng ki jaka bapher bapher jong ka Arunachal Pradesh. La kem lai ngut ki briew kiba donkti ha ka kam khaïi khynnah. Ngi dang tohkit ïa kane ka kam,” la ong u Superintendent of Police u Sangey Thinley.
Kiba bun na ki khynnah kiba la shah pyllait im ki don hapoh 8 snem, ha kaba kiba rit tam ki don haduh lai snem, la ong u Thinley. La thaw ïa ka kynhun tohkit ba kyrpang (SIT) ban tohkit bniah ïa kane ka kam. Katkum ki khubor, la ïathuh ba ki don napdeng ki khynnah kiba la shah pyllait im, kiba la pynlong ban trei kum ki nongïarap ïing ne ki hotel.
Uwei u nongïakhih uba don bynta ha ka jingpyllait im bad pynbha ïa ki khynnah u la ong, “Ka don ka jingduna bor briew ha Arunachal Pradesh bad ka don ka jingdawa ïa ki nongtrei ha ki hotel, ki jaka bam bad kum ki nongïarap ha ïing. Ki nongïarap ha ïing ki sem. Ki nongïarap ki trei na ka bynta ka kynhun khaïi pateng.
Ki don ka jingïadei kaba bha bad ki tip ïa ka jingdawa. Ki thmu ïa kiba bun ki longïing kiba duna ha ka liang ka ïoh ka kot bad shim ïa ki khynnah na ka bynta ban pyntrei ha kiba bun ki bynta jong ka Arunachal Pradesh.
Ha kiba bun ki jingjia, ki ju don ki jingujor shaphang ka jingjah ki khynnah bad kine ki khynnah kim ju leit phai ïing shuh.”
Uwei u nongïalam jong ka All Tea Tribes Students’ Association (ATTSA) u la ong, “Ki nongkhaïi khynnah ki ju thmu ïa ki bynta kiba rit paid ha ka imlang sahlang. Kiba bun ki khynnah kiba shah khaïi ki dei na ki jaka rep sha jong ka Assam. Kham bunsien, la rah ïa ki sha Arunachal Pradesh na ka bynta ki kam ïing kam sem.”
Katkum ka kaiphod jong ka National Crime Records Bureau (NCRB) Crime in India 2024, ka Arunachal Pradesh ka la buh jingthoh ïa 8 tylli ki kam khaïi briew ha u snem 2024 kaba kynthup ïa ka jingithuh ïa ki 66 ngut ki lanot.
Ka kaiphod ka la pynpaw ba baroh 66 ngut ki lanot ki la shah die na ka bynta ki kam awria.
Ki pulit ki la kem 52 ngut ki briew ha ki kam khaïi briew ha ka shisnem, hynrei ym shym la don kano kano ka jingshah rai pynrem.
Ka jylla ka la buh jingthoh ruh ïa ka jingpyllait im ïa ki 38 ngut kiba shah lehbeiñ, kaba pynpaw ïa ka jingïapher hapdeng ka jingkem, ka jingpyrshang ban pyllait im bad ka jingpynngat mukotduma kaba jop ha ki mukotduma khaïi briew.
