Shillong, Nailar 25
Ka India ka dangïaid shaphrang ban pynkhreh ïa ki saw tylli ki jingïalehkai bar ri pyrshah ïa ki kynhun ïalehkai jong ka FIFA World Cup 2026, mynta u snem.
Kane ka la wan hadien ba ka All India Football Federation (AIFF) ka la soi ïa ka shithi halor ka jingthmu ban ïalehkai bad ka Panama kaba don ha ka kyrdan kaba 44 na ka bynta ka jingialehkai paralok ha la ïing ha u Nailur lane Risaw.
Ka jingïalehkai pyrshah ïa ka Panama kan long ha ka taïew kaba kut jong u bnai kata ha ka 26-27 tarik u Nailur. Ïa ka jaka ban pynlong yn sa pynthikna kham hadien.
Kumba ka paw ka India kan pynkhreh ïa ka jingïalehkai pyrshah ïa ka Brazil ha Kolkata ha ka 3 tarik u Risaw bad ki don ar tylli ki jingïalehkai bar ri pyrshah ïa ka New Zealand ha u Naiwieng, ha kine ki lai bnai ban wan yn sa ïohi ïa ka jingïalehkai saw sien pyrshah ïa ki kynhun kiba ïoh shim bynta ha ka World Cup kaba dang shu dep.
“Ka don ka jingïalehkai kaba kham khraw ha ka jingïalehkai paralok bar ri pyrshah ïa kawei ka kynhun kaba shim bynta ha ka World Cup ha ka 6 tarik u Risaw,” la pynpaw uwei na ki nongïalam ka AIFF.
“Ka jingïakren ka dangïaid bad lai tylli ki ri kiba la ïalehkai ha ka World Cup kaba dangshu dep na ka bynta ki jingïalehkai paralok ba ri.”
Kumba ka paw ka Panama ka la shah rem noh ha ka World Cup ha ka jingïalehkai group.
