Agartala, Nailar:
Ka dorbar Lyiur ïingdorbar thawaiñ jong ka Tripura kan sdang ha ka 27 tarik u Nailar bad kan kut ha ka 31 tarik, Nailar, ha kaba ka ïingdorbar kan shong lai sngi, kata ha ka 27, 28 bad 31 tarik u Nailar.
Ïa kane ka rai la shim ha ka jingïalang jong ka Business Advisory Committee (BAC) kaba la long ha ka ïingdorbar thawaiñ ha ka sngi Thohdieng ka 21tarik Nailar bad ïa kane ka jingïalang la pynïaid da u lamphang ka ïingdorbar u Rampada Jamatia.
U Jamatia u la ong ba ka jingïalang kan sdang ha ka por 11 baje mynstep bad u la batai ba la pynbeit ïa ki tarik khnang ban lait na ka jingthut kaba ju jia namar ka sngi kut taïew haba ka jingïalang ka sdang ha ka sngi Thohdieng.
“Ym pat don kano kano ka bill kaba la buh kyrteng mynta, watla kawei ka lah ban wan ha ka por shong dorbar”, la ong u Lamphang ka ïingdorbar.
Ka Ïingdorbar ka la dep ban ïoh pdiang ïa ka jingpynbna ïakren kaba lyngkot na u MLA ka Congress u Sudip Roy Barman halor ki mat kiba ïadei bad ki Smart Meter bad ka bai bording. Ïa ka jingpynbna la pdiang, la ong u Jamatia.
Lah ruh ban ïoh ïa ki jingpynbna kiba kham bun halor ki mat kiba ïadei bad ka jingmyntoi jong ki paidbah shwa ka dorbar, u la bynrap.
Ha kane ka jingïalang jong ka BAC la ïakren ïa ka mat ba la buh, ka jingjrong por bad ki jingpynbeit na ka bynta ban ïaid beit ïaid ryntih ïa kane ka dorbar.
Halor ka jingthmu ban pynlong ïa ka ïingdorbar khlem kot, u Jamatia u la ong ba katei ka rukom kan donkam por shuh shuh shwa ban pyntreikam ïa ka.
Ha kane ka jingïalang la leit ban ïa shim bynta da u Deputy Speaker u Ram Prasad Paul, u Ratan Lal Nath uba long u Parliamentary Affairs, Myntri ka tnad Transport and Tourism ka Sushanta Chowdhury, u nongïalam ka liang pyrshah bad u MLA ka CPI (M) u Jitendra Chaudhury, u MLA ka seng Congress u Gopal Chandra Roy bad u Myntri u Animesh Debbarma.
Ka jingïalang kaba lai sngi la khmih lynti ba kan ailad ïa ki nongthaw aiñ ban rah ïa ki mat kiba ïadei bad ka jingmyntoi paidbah, ka roi ka par bad ki jingthmu ba kongsan jong ka jylla ha ka lawei.
U Lamphang u la pynpaw ka jingkyrmen ba ka jingïashim bynta kaba tei bad ka jingïakren kaba don jingmut da ki dkhot kan pynlong ïa ka jingïalang kaba seisoh bad kaba myntoi na ka bynta ki paidbah ka Tripura.
