Guwahati, Nailar:
Ka kynhun ki pulit Assam ka Special Task Force (STF) ki la kem ïa uwei u samla uba la 21 snem ka rta, uba la shah kynnoh ba u don jingïadei bad ka Shahadat-e-Bhatti Network (SBN) kaba don ha Pakistan ha Hailakandi bad baroh kiba la shah kem ha katei ka kam, ki la poi sha ka saw ngut.
Une uba shah kynnoh u dei uba la tip kyrteng kum u Fazal Islam Barbhuiya u la shah kem ha ka jingkhynra kaba la pynlong ha Ramanathpur ha Hailakandi.
Ïa kane ka jingkhynra la leh lang da ka STF bad ki Pulit ka Hailakandi kum shi bynta ban tohkit ïa ki kam ba la kynnoh jong kane ka seng ba la shah ñiew beaiñ.
Katkum ka jingïathuh ki heh sorkar, la kynnoh ba u Barbhuiya u dei uba don jingïadei bad ka SBN kaba don ha Pakistan bad u la phet rieh ban lait na ka jingshah kem.
La thwet ïa u ha kaba ïadei bad ka STF Police Station Case No. 06/2026.
Ki bor pahara ki la lap ruh ïa ki tiar bad ki kot ki sla kiba lah ban shah kyntait ha ka por ba pynlong ïa ka jingkhynra. Ïa ki tiar ba la kurup yn eksamin kum shi bynta jong ka jingtohkit ban lap ïa ka jinglong jong ka jingkynnoh ba u Barbhuiya u don jingïadei bad ka kynhun bad ban lap ïa kiwei pat ki briew kiba don jingïadei bad kane ka kam.
Kane ka jingshah kem kaba dang shen ka dei hadien ka jingïoh kem kum juh ha Dhubri, Chirang bad Barpeta ha kaba ïadei bad ka kam SBN.
Da ka jingshah kem jong u Barbhuiya ha Hailakandi, baroh ki nongshah kynnoh ba la shah kem ha kane ka kam ki la poi sha ka saw ngut.
Ka Assam STF ka la pynlong ïa ki jingkhynra pyrshah ïa ki kynhun lehnoh ba la suba ba ki donkti ha ki kam pyrshah ri ha kylleng ka jylla.
Ki nongtohkit ki dang bishar bniah ïa ki jingïadei jong kito kiba shah kem bad ki dang bishar bniah la kiba shah kynnoh ki don jingïadei bad ka kynhun kaba kham heh.
Ka jingtohkit kaba bniah halor kane ka kam ka dang ïaid shakhmat.
