Shillong, Nailar 26
Ka Mawlai Sports Club ka la bteng ban khur biang ïa ka jingjop ha ka Shillong Premier League 2026, hadien ba la pynliem noh ïa ka Mylliem SC da 2-1 kol ha ka sngi Balang.
Ha kane ka jingïakhun dei ka Mylliem SC kaba la ïoh ban pynkhih jar nyngkong lyngba u Istarbor Marngar ha ka minit kaba 33.
Hadien hadien katto katne por shwa ban shongthait shipor, ka Mawlai hapoh ka jingïalam da Bah Hering Shangpliang (coach) ka la pynphai kylla shi kol lyngba u Basuklang Bina ha ka minit kaba 41.
Haba wan ban bteng ïa ka kylla miet, ka madan ka la sdang ban lang um hadien ka jingwan u slap, ha kaba ka la long kaba i syrtok bha ïa ki rangïalehkai jong baroh ar kynhun namar ki la shem jingeh bha ban ïalehkai, kaba ha kiba bun hi ki bynta jong kane ka madan, ka um slap kam shim la sam kloi bha shapoh khyndew, kaba hangne ba ha kiba bun ki khep, ki rangïalehai ki la pyrshang ban shu ïalehkai noh nalor ïa ka bol.
Watla katta ruh kat kane ka jingeh ba ki shem, hynrei ka jingïakhun pat ka long kaba ïakhaid bha, kaba na ka por sha ka por, ka Mawlai bad Mylliem, ki la pyrshang katba lah ban ïoh thep kol.
Ha ki khyndiat minit jong ka kylla miet, ka Mawlai shipor, ka la ïalehkai kham bha bad ñion bor bha ïa ka kut ïalehkai jong ka Mylliem, ïa kaba la ïeng ban khanglad bad shan tyngeh bha ïa ka da ki rangïalehkai ‘dien jong ka.
Ha ka minit ba la pynjlan artad ïa ka por ïalehkai kaba i kumba ka poi sha ka jingïakhaid, ka Mawlai ka la ïoh ïa ka kabu kaba paka bha ba kan thep ïa ka kol kaba ar lyngba u Lovingstar Suting (90+4), kaba ym slem hadien kane, ba ka por ruh ka la lap ba poi noh sha kaba kut bad ka Mawlai kan wanphai biang bad ka jingjop, katba ka Mylliem SC ka la hap ban pdiang ïa ka jingshah rem.
Ha ka sngi Palei ka jingïalehkai kan long hapdeng ka Shillong Lajong FC pyrshah ïa ka Nongkseh SSCC ha ka por 5:30 janmiet.
Ban shu kyrtiang dien ha ka samoi ïalehkai u snem ba la dep, kine ki ar kynhun ki la ïoh ïa ka kabu ban ïa aireng hapdeng para ma ki jan haduh arsien ha ka SSA Champions Cup bad ruh ha ka 5th Meghalaya State League ba la pynlong da ka MFA mynta u snem, bad dangshen kine ki ar kynhun ruh ki dang shu dep ba kin ïakhun pyrshah ha ka Durand Cup ha kaba ka Lajong ka la khur jingjop.
