Shillong, Nailar 26
Ka India ka la rah ïa ka nam ‘Overall Champion’ ha ka jingïalehkai martial arts jong ka 1st Indo-Bhutan International Games 2026, kaba la poi sha kaba kut ha ka 23 tarik mynta u bnai ha Phuentsholing, Bhutan.
Ha kane ka lympung kaba la sdang naduh 21 tarik, ka synjuk ïalehkai ka Jylla hapoh ka lama jong ka Meghalaya School of Martial Arts (MSMA) ka la sei haduh 48 ngut ki nongïalehkai kiba la mihkhmat ïa ka ri India bad kine baroh ki la khur takma.
Kane ka kynhun ïalehkai ka Jylla ka la khur 40 ki takma ksiar lem abd 8 tylli ki takma rnong. Ïa kane ka kynhun jong ka Jylla la ïalam da san ngut ki nongïalam, kynthup ïa u Bah D. Ranee, Chairman ka MSMA bad ka Kong Bajoplin Kharmudai, General Secretary ka Meghalaya Jeet Kune Do Association (MJKA).
Kane ka jingjop ka pynpaw ïa ka jingaiti lut, ka jinglong ryntih bad ka jingtrei shitom jong ki nongïalehkai, ki coach bad ki bor ba dei khmih. Kane ka lympung ïalehkai bar ri ka plie lad ïa ki nongïalehkai ka Jylla ba kin pyni ïa ki sap ïalehkai jong ki hakhmat ka pyrthei.
Na ka liang ka MSMA ka la ai khublei ïa ki nongïalehkai lem bad ki bor ba dei khmih kiba la lah ban pynurlong bad ban wanrah burom na ka bynta ka Jylla bad ïa ka ri hi baroh kawei.
