Shillong, Nailar 26
Kan dei ka sien kaba nyngkong eh ba ka shlem ai jinghikai jong ka Sei La Ka Sap Socio Cultural Sports Club ka la ïoh ban sei ïa ki ar ngut ki heprit kiba long ki soh nyngkong, kiba la shah jied ban leit shah pyntbit ha ka shlem ai jinghikai ba paw na Punjab, ka Minerva Football Academy hapoh ka jingïalam u Rajit Bajaj.
Kine ki long u Henry Warjri ba dang 11 snem ka rta na Mawïong Umjapung uba dei u rangapkol bad u Mark Ammiel N. Majaw ba dang 10 snem ka rta na Mawlai Umjajew uba dei u rangïalehkai shakhmat.
Watla kane ka klob kaba dang shu seng ha u snem 2023, hynrei ka la lah ban sei ïa kitei ki ar ngut ki khynnah napdeng kumba 80 ngut kiba la wan shah hikai pyntbit hapoh kane ka shlem ai jinghikai kaba don ha Mawlai Umthlong Dong Lummawnei.
Ka jingshah jied kine ki khynnah ka la wan hadien ka jingwan jied khynnah dangshen da katei ka shlem ai jinghikai kaba na Punjab, ka Minerva Football Academy ha kane ka nongbah.
Ka jingpaw ka Minerva Academy ha ka kylleng ka pyrthei, ka la wan hadien ba ka la lah dangshen ban rah ïa ka nam lahduh ha ka sien kaba nyngkong eh ha ka World Youth Cup 2026 lyngba ka jingjop ha ka final jong ka Under-12 ïa ka RS Sports kaba na Brazil da 2-1 ha Gothenburg, Sweden.
Na ka liang ka Sei La Ka Sap Socio Cultural Sports Club ha ka sngi Balang ka la pynlong ka jingïalang kaba kyrpang ban ai khublei ïa kitei ki khynnah hashwa ba kin mih na kane ka nongbah ban leit sha Punjab.
Ha kane ka sngi la ïadon lang u nongïalam barim ka Khasi Students Union (KSU), Bah Joe Marbaniang kum u kongsan ha ryngkat ka jingïadon lang ki kmie ki kpa jong ki khynnah, ki dkhot katei ka klob bad kiwei kiwei.
Haba ïakren bad u nongthoh khubor, baroh ar ngut kitei ki khynnah ki la pynpaw ka jingkmen halor kane ka jingshah jied ka jong ki ban leit shah pyntbit ha ka Minerva. “Watla ngi hap ban don jngai na la ïing, hynrei ngi khmih lynti ba ngin ïalehkai bad ruh ban pynurlong ïa ka jingangnud ba shisien ka sngi ngin ïoh ban mihkhmat ïa ka ri India ha ki lympung ïalehkai shabar ri.”
Kumjuh ki kmie ki kpa jong ki khynnah ruh ki la pyrpaw ka jingsngewkmen eh ba ki khun jong ki, ki la shah jied ha katei ka shlem ai jinghikai ba paw jong ka ri India.
“Ha ka jingshisha ngim shym la poi pyrkhat ba ki khun jong ngi kin shah jied ha ka Minerva. Lyngba kane ka jingshah jied kan long ka jingplie lad na ka lawei kaba phyrnai ka jong ki ha ka kam ïalehkai,” la bynrap ki kmie ki kpa jong kitei ki khynnah.
Ha kawei pat ka liang u Bah Andy Nelson Warjri (Head Coach D-Licence) u la pynpaw ka jingkmen halor kine ki soh nyngkong kiba la paw na kane ka shlem ai jinghikai. “Kine ki khynnah ki don shisha ïa ki sap ïalehkai ba kyrpang bad lyngba ka jingïalam jong ngi lem bad kiwei ki khynnah ka la long ka jingplie lad na ka bynta kitei ki ar ngut.”
“Ngi khmih lynti ba kine ki khynnah kin nangkiew shaphrang ha ka kam ïalehkai jong ki bad ruh ba shisien ka sngi kin ïoh ban mihkhmat ïa ka ri India. Ngi pynshlur ruh ïa kiwei pat ki khynah kiba dangdon hapoh ka shlem ai jinghikai jong ngi ba ki dei ban ïai trei shitom khnang ba kin nangkiew shaphrang ha ki kam ïalehkai jong ki.”
