Imphal, Nailar:
Ki la don 6 ngut ki suba lehnoh, kynthup ïa u khynnah ba dang poh rta, kiba la kynnoh ba ki donkti ha ki kam dawa pisa, pyntieng bad rahbor, ki la shah kem ha ki distrik jong ka Imphal Valley jong ka Manipur, ong ka khubor pulit ha ka sngi Balang.
Ïa kitei ki 6 ngut ki lehnoh, kiba dei na ka kynhun United People’s Party of Kangleipak (UPPK) kaba la shah ñiew beaiñ, la kem na ki jaka bapher bapher ha Bishnupur, Imphal East bad Imphal West distrik ha ka sngi Ba-ar, 25 tarik, Nailar.
Napdeng kiba la shah kem, u dei u P Koireng Singh, uba la 51 snem ka rta, uba la shah kem na Koirengei Forest Gate ha Imphal West. Katkum ka jingpynbna paidbah, u Singh u trei kum u nongsumar kper ha ka tnad ba dei khmih ïa ki khlaw.
Ki pulit ki la ïoh ban kurup haduh 23 tylli ki letterhead jong ka UPPK na ki lehnoh kiba la shah kem. La kynnoh ba kiba shah kynnoh ki la phla ba ki donkti ha ki kam rahbor, dawa pisa bad pyntieng pynsmiej, ong ka kyrwoh.
Ha ka jingkhynra kaba kyrpang, ki bor pahara ki la ïoh kurup ïa ki tiar ïaleh bad ki kuli ha ka por ba ki pynlong ïa ka jingkhynra bad khynra ha Taphou Kuki kaba don ha Kangpokpi distrik bad ha ka Taphou Liangmai kaba markhap ha Senapati distrik.
Ka kynhun ba ïatreilang jong ki pulit ka Manipur bad ki CRPF ki la pynlong ïa kane ka jingkhynra ha ka sngi Ba-ar bad ki la ïoh ban kurup ar tylli ki suloi SBBL, 78 song ki ki kuli 12-bore bad ki song kyli jong ki suloi AK-47 bad .22, ong ka kyrwoh.
Ki bor pahara ki la pynpra ruh ïa ar tylli ki Bunker ha Taphou Kuki bad sa kawei pat ka Bunker ha Taphou Liangmai ha kane ka jingkhynra.
Ka jingtohkit kaba kham bniah halor ki kam jong ki heh ka UPPK kiba la shah kem bad ki tiar kiba la ïoh kurup ka dang ïaid shakhmat.
