Aizawl, Nailar:
Ka sorkar Mizoram ka la thied palat 2 lak kwintal u sying na ki nongrep trai ri mynta u snem hapoh ka skhim ba kongsan jong ka Bana Kaih, lane Handholding, ong u Myntri ba dei khmih ha ka Agriculture and Farmers’Welfare u PC Vanlalruata ha ka ïingdorbar jylla ha ka 25 tarik u Nailar.
Haba jubab da ka jingthoh halor ka jingkylli ha kane ka por tlang ba dang ïaid shakhmat, u Vanlalruata u la ong ba la thied haduh 2,00,481.55 kwintal u sying na ki nongrep haduh ka 18 tarik u Nailar.
Ka sorkar ka la pyllait T.51.13 klur sha ka dor kyrshan na ka bynta u sying ba la thied mynta u snem, da kaba shim ïa ka pisa baroh kaba la pyllait hapoh ka skhim na ka bynta ban thied sying ha u snem 2025 bad 2026 sha ka T.192.63 klur.
U Vanlalruata u la ong ba kim don ki jingsiew jingkyrshan-dor kiba dang sahteng na ka sorkar. Ïa ka pisa baroh la pyllait bad la thep ha ka Account jong ka DAMC, na kaba la pynpoi ïa ki jingsiew sha ki Bank Account jong ki nongrep kiba ïadei kam.
Kane ka prokram thied ka dei shi bynta jong ka jingkular jong ka sorkar ba la ïalam da ka Zoram People’s Movement ban thied san tylli ki mar rep ba kongsan na ki nongrep ha ka dor jingkyrshan kaba rit tam. Ki jingthung kiba la tap hapoh u Bana Kaih ki long u sying, shynrai, sohmynken, ki siej bad kba.
U sying u don ka jingkordor kaba kyrpang na ka bynta ka Mizoram. Ïa kane ka jylla la ithuh da ka NITI Aayog kum ka “Ginger Capital of India” ha u snem 2025. Na ka bynta u snem mang tyngka 2026-27, ka sorkar ka la mang T.350 klur na ka bynta u Bana Kaih, kynthup T.150 klur kyrpang na ka bynta ban thied ïa ki san jait ki jingrep ba la ithuh.
