Shillong, Nailar 27
Ka shi kol ba la thep da u Lalmuansanga ka la biang pura ïa ka Shillong Lajong FC ban pynliem noh ïa ka Nongkseh SSCC da 1-0 kol ha ka lympung ïalehkai Shillong Premier League 2026 kaba la long ha ka sngi Palei ha SSA Stadium, Polo.
Kane ka shi kol ka la wan urlong lyngba u penalty ha ka minit ba 55 na ka bynta ban pynlong ïa ka Shillong Lajong ban ïaryngkat bad Mawlai lem bad ka Meghalaya Police, kiba la don ha ka kyrdan ba nyngkong bad ba-ar.
Kane ka jingshah rem ka Nongkseh ka la wan hadien ar snem ba ka la lah ba kan mih madan ban ïakhun khlem shah rem ha ki lympung ïalehkai ka Shillong Sports Association naduh u Naiwieng jong snem 2025 bad kaba la poi pat noh sha kaba kut hynne ka janmiet.
Ha ka jingshisha, ka Lajong ka la sei da kawei pat ka kynhun (second team) naduh ba ka la pynliem ïa ka Nongkseh SSCC ha ka jingïalehkai jong ka Durand Cup.
Ka jingïakhun ka long ba ka Nongkseh ha ka kylla miet, ka la ïaleh ban ñion borbah, kaba hangne ba ka pynlong ïa ka ban ngat ha kiba bun tylli ki ‘foul’ kaba pynlong ïa u Hamedamanbha Wahlang bad Arlangky Nongsiej ban shah ai jingsneng ha u rephri.
Ka penalty kaba ka Shillong Lajong FC ka la ïoh ka dei lyngba ka jingpyndei da ka kti ïa ka bol kaba hangne u Lalmuansanga u la tur shakhmat ban shut ïa ka bol da kaba lah ban sam lyngba ïa u rangapkol ka Nongkseh, u Daraphun Talang. Watla u la pyndem ka met sha ka phang ba her ka bol, hynrei um shym la lah pat ban kner bha ki kti jong u ban kyrda ïa ka jong ka kol.
Shwa ïa kane, ki kabu ksiar ki la paw shynna ïa ka Nongkseh lyngba u Dawanchwa Challam ha ka minit ba 17, Banshanskhem Kharsyntiew bad Shano Tariang, ïa kaba la ïeng ban kyrda da ki rangïalehkai ka Shillong Lajong bad kaba pynlong ïa u rangapkol u Banshanskhem ban kylla long u rangapkol u bym pat shym la shah thep wat shi kol ruh naduh kaba sdang kane ka lympung.
Haba shim kyllum, ka Nongkseh watla ka long kaba kham skhem bha ka rukom ïalehkai jong ka, hynrei kaba kut pat ka long ba kam lah ba kan pynwandur ïa ki kabu ksiar ba ka la ïoh.
Kumta lyngba kane ka jingjop, ka Shillong Lajong ka la ïaryngkat mar 7 point bad ka Mawlai bad ka MLP. Kaba sngewphylla ka long ba baroh lai tylli ki kynhun ki la khur jingjop mar ar sien bad ïakhaid mar shisien.
Ha ka sngi Thohdieng ka jingïalehkai kan long hapdeng ka Laitkor SC pyrshah ïa ka lahduh jong ka aïom ba la lah, ka Langsning FC, ha ka por 3:40 nohphai sngi.
