Shillong, Nailar 27
Ka Meghalaya Football Association (MFA) ka la pynbna ïa ki kyrteng jong ki 20 ngut ki rangïalehkai phutbol ka Jylla ki ban leit shim bynta ha ka Junior Boys National Football Championship 2026-27 (Tier 1) na ka bynta ka Dr. BC Roy Trophy ka ban long ha Bengaluru.
Kane ka kynhun ka la shah pynngat ha ka thup kaba kham jwat jong ka Group-C kaba kynthup lang ïa ka Tamil Nadu, Mizoram bad ka Maharashtra. Ki kynhun kynhun ki ban wan ha ki kyrdan ba hakhlieh jong ki group kin ïoh rung sha ka semi final.
Te kumta ka Meghalaya kan sdang ïa ka jingïalehkai kaba nyngkong ha ka 1 tarik u Nailur 2026 pyrshah ïa ka Tamil Nadu.
Hashwa ba kane ka kynhun kan mih na ka nongbah hapoh ka jingïalam u coach u Bah Playerson Jitem Syiemlieh, na ka liang ka MFA ka la pynlong ka jingïalang kaba kyrpang ha ka sngi Palei na ka bynta ban ai khublei kitbok ïa ki rangïalehkai kane ka kynhun khnang ba kin ïalehkai bha bad ruh ban wanrah nam bad burom ïa ka Jylla.
Ha kane ka sngi la ïadon lang u President ka MFA u Bah Hamletson Dohling, kumjuh u Vice-President Bah Cliff Nongrum bad u Chairman ka Youth Development Cell u Bah Freddy Kharpran present nalor kiwei pat kiba la ïadon lang.
Haba ai ki kyntien sneng kyntien kraw ïa ki khynnah, u Bah Hamlet u la ban ïa ki khynnah halor ka jinglong adkar ha baroh ki liang, la ka liang ha madan ne shabar na ka jaka ïalehkai. “Kane ka long ka kabu ksiar ïa ki rangïalehkai kiba dangkhynnah ba kin tyngshaiñ ha ki lympung ïalehkai kiba long shabar na ka jong ka Jylla bad ba kin nangsan ha ka kam ïalehkai phutbol.”
Ki kyrteng ki 20 ngut ki khynnah ki long u Franky Kharkrang, Mangpaka Nong -kynrih, Aiborlang Mulieh, Sannaky Nongsiej, Kishan Wahlang, Shanborlang Khonjee, Samuel Malieh, Seibok Lyngdoh, Damankynsai Marbaniang, Albin Kharbani, Malenga N Sangma, Skhemlang Myrthong, ME Matlai, Adriel Nongbet, Pyrkhat Marbaniang, Wallambok Thongni, Aibannangkhraw Kharumnuid, Andrew Kharsati, Habankhlur Lyngdoh Mawnai bad u Haban Kara Blah.
Ki nongïarap ïa ka kynhun ki long u bah Playerson Jitem Syiemlieh (head coach), Snenglang Wankhar (assistant coach), Amit Rai (manager) bad Levon Lyngdoh (physio).
Nalor ka jingïakhun pyrshah ïa ka Tamil Nadu, ka Meghalaya kan ïakynduh pyrshah ruh ïa ka Maharashtra ha ka 3 tarik bad ha ka 5 tarik u Nailur ïa ka Mizoram.
