Khliehriat, Nailar 27
Ka Moolamanoh SC, Dkhiah West SCSO, Suchen Lum-iarain SC, Lama Youth SC, Narwan SCSC, Khlieh -riat West FC, SWO Moo-sianglamare Old SC, bad Tuber Kmaishnong SCSC ki la jam sha ka quarter final jong ka lympung ïalehkai 2nd Division Football Tournament ba la pynïaid da ka East Jaiñtia Hills District Football Association (EJHDFA).
Katba ki kynhun kiba shah pynhiar kyrdan (relegation) sha ka 3rd Division ha ka samoi ïalehkai ban wan ki long ka Mukhaïalong SCSC, Rangad SCSC, Wapung Shnong SCSC bad ka Lumshyrmit SCSC.
Haba phai sha ka jingïalehkai kaba nyng-kong mynta ka sngi Palei ha madan artificial turf Diengshynrum, Khliehriat, hapdeng ka Ryntihlang SC Brishyr-not bad Narwan SCSC ki la kut ha ka jingïakhaid khlem da lah ban pynkhih jar.
Ha ka jingïalehkai kaba bud, ka Khliehriat West FC ka la pynliem noh ïa ka Ratacherra CSC da 2-1 kol.
Watla kine ki kynhun kim shym la lah ban thep kol ha ka kylla step, hynrei ka Ratacherra CSC ka la ïoh ban pynkhih jar ha ka minit kaba 49 lyngba u Ngamklet Pohleng. Hadien katto katne por ka
Khliehriat West ka la wanphai da ka jingkhlaiñ bor na ka bynta ban pynphai kylla haduh ar kol lyngba u Zanwame Swer (60) bad u Owenson Malang (74) na ka bynta ban khur syndon ïa ka jingjop.
Ha kawei pat ka jingïalehkai, ka SWO Moosiang Lamare Old SC ka la jop da 4-1 kol ïa ka Lumshyrmit SC. Ïa ki kol na ka bynta ka Moosiang Lamare Old la thep da u Premio Muksor ha ka minit kaba 18, kumjuh u Meshwa Lapasam (65) bad u Pynïar Pusein (77 & 80) uba la thep ar kol. na ka liang ka Lumshyrmit ka la pynphai kylla shi kol lyngba u Firstborn Tariang (50) hashwa ba kan mad ïa ka jingshah rem.
