Shillong, Nailar 27
Ka kynhun ïalehkai U-15 Boys jong ka North Liberty HSS na West Jaiñtia Hills bad ka kynhun ïalehkai U-17 Boys jong ka O.M Roy Memorial HSS na East Khasi Hills ki la long ba la khreh ban leit shim bynta ha ka lympung ïalehkai 65th Subroto Cup International Football Tournament 2026.
Ka jingïalehkai Under-15 kan long ha Bengaluru naduh 1 tarik haduh 9 tarik u Nailur, katba ka Under-17 kan long ha New Delhi naduh 15 haduh 24 tarik u Nailur. Katba ka Little Star English Medium HSS na Eastern West Khasi Hills ka la wanphai ïing noh hadien ba ka la mad ïa ka jingshah rem noh ha ka quarter final jong ka Under-17 Girls, kaba dangshu dep ha nongbah Delhi.
Hashwa ba kine ki kynhun kin mih na ka nongbah, na ka liang ka tnat ïalehkai jong ka Sorkar Jylla ka la pynlong ïa ka prokram kaba kyrpang ba ai khublei kitbok ïa kine ki kynhun khnang ba kin lah ha ka ban ïalehkai bha ha katei ka lympung bad ruh ban wanrah nam bad burom ïa ka Jylla.
Ha kane ka sngi la ïadon lang u Myntri ka tnat ïalehkai jong ka Sorkar Jylla, Bah Wailadmiki Shylla kum u kongsan ha ryngkat ka jingïadon lang u Director ka tnat ïalehkai Bah A. Nongbri, kumjuh u Deputy Director Bah Païa War Nongbri, kumjuh u Assistant Director Bah Khroobok Passah, ki District Sports Officer, ki coach, ki khynnah bad kiwei kiwei.
Na ka liang u Bah Wailadmiki u la ai khublei kitbok ïa kine ki ar tylli ki kynhun ba kin ïalehkai bha ha katei ka International Subroto Cup ka ban long ha Bengaluru bad ha New Delhi.
U la ai jingïaroh ïa kine ki ar tylli ki skul ba ym tang ba ki la shim khia ha ki kam ïalehkai, hynrei ki la long ruh kiba paw ha ka jingnang jingstad lyngba ka jingmih ki khynnah kiba trei shitom kat haduh ba ki la wanrah nam bad burom ïa ka skul hi baroh kawei. “Ka North Liberty ka dei ka skul kaba la paw bha ha ka jingpule lyngba ka jingpass bha ki khynnah ha ki eksamin SSLC bad HSSLC. Nga kyrmen ruh ba ka skul OM Roy kan da lah ban dei ïa ki khynnah kiba tyngshaiñ ha ka jingnang jingstad ruh kumjuh.”
Ha kawei pat ka liang u Bah Shylla u la pynpaw ka jingdiaw mynsiem halor ka jingduna ki skul kiba shim bynta ha ka Subroto Cup da kaba ki la ïa kiba bun ki daw halor ki jingbym lah ban ïashim bynta jong ki. “Ngam lah khlem da ai khublei ïa kiwei pat ki skul kiba ïashim bynta ha ka Subroto Cup nadu ki District Level khamtam eh ïa ka North Liberty bad ka OM Roy kiba mihkhmat ïa ka Jylla sha katei ka lympung. Te kumta nga ai khublei kitbok ïa baroh ar tylli kine ki kynhun ba kin ïalehkai bha khnang ba kin lah ban kynjoh sha ka thong.”
Katba na ka liang u Director ka tnat ïalehkai Bah A. Nongbri u la kyntu ïa ki khynnah ba kin long adkar ha baroh ki liang haba ki don shabar na ka Jylla. “Kynmaw ïa ka akor burom ban lait na ka shah kynthoh.”
Lah ban kdew ha ka jingïakhun final jong ka Under-15 ha ka State Level Subroto Cup kaba la long ha ka nongbah Shillong, ka North Liberty ka la jop da 2-1 kol ïa ka Umpohliew Jingtip Higher Secondary School, katba ha ka final Under-17 ka Om Roy ka la jop da 3-0 kol ïa ka Wapung Higher Secondary school na East Jaiñtia Hills.
