Shillong, Nailar 28
Kum shibynta ban lum ban lang ïa ki samla jong ka Parish Mawbri bad ban lait na kino kino ki sniew, ka Seng Samla Catholic Parish Mawbri ha ka 22 tarik mynta u bnai ka la pynlong ïa ka Sport Meet ba shisngi na ka bynta u snem 2026, kaba la pynlong ha Sub-district Nongtraw ha Balang Shnong Nongtraw.
Ha katei ka sngi la wan ïashim bynta na baroh ki saw tylli ki Sub-district kiba hap hapoh Mawbri Parish kiba kynthup ïa ka Sub-district Umroi, Sub-district Raid Ïapngar, Sub-district Mawbri bad ka Sub-district Nongtraw.
Ïa kane ka Sports Meet la plie da u MDC jong ka Umroi Constituency u Bah Isynei Hinge kum u kongsan bad u Bah Bandari Ryntathiang kum u symbud kongsan ha ka jingïadon lang u Rangbah Shnong jong ka shnong Nongtraw Bah Robert Dempep, samla Phrangki Marbaniang, President Seng Samla Catholic Parish Mawbri bad samla Precious John Madur, Secretary ka Seng Samla Catholic Parish Mawbri.
Ha ka por janmiet la wan pynhap pyrda da ka Kong Naphishisha Marweiñ kum ka kongsan bad u Bah Revilstar Kharumnuid kum u symbud kongsan ha ka jingïadon ryngkat u Fr. Sherman Kongshei ba dei SYD jong ka Seng Samla Catholic Parish Mawbri.
Ha katei ka sngi, ki don bun jait ki jingïalehkai kiba khynthup ïa ka phutbol, ïatan tyllai (ka Tug of war), sack race bad pillow fight.
Ha ka jingïalehkai phutbol jong ki shynrang, ka Seng Samla Sub-district Raid Ïapngar ka la pynliem noh ïa ka Seng Samla Catholic Sub-district Umroi bad ha ka liang ki kynthei, ka Seng Samla Sub-district Mawbri ka la pynliem noh ïa ka Seng Samla Sub-district Nongtraw. Ha ka jingïalehkai tan tyllai jong ki shynrang, ka Seng Samla Sub-district Raid Ïapngar ka la pynliem ïa ka Seng Samla Sub-district Mawbri bad ha ka liang ki khynthei, ka Seng Samla Sub-district Raid Ïapngar ka la pynliem noh ïa ka Seng Samla Catholic Sub-district Umroi.
