Gangtok, Nailar:
Ki la don 8 ngut ki nongshong shnong jong ka Sikkim kiba don ha ka Kailash-Mansarovar Yatra kiba la sahkut ha Tibet hadien ba ka jingshlei um kaba la lynshop ha katei ka thaiñ ar sngi shwa, hynrei baroh la ïoh ban ïakynduh bad ki don ha ka jingshngaiñ, ong ka Disaster Management Authority ha ka sngi Thohdieng.
Ka Sikkim State Disaster Management Authority (SSDMA) ka la ïathuh ba kine ki nongleit ïaid riewblei lyngba ïa u pud Nepal-China ha ka 25 tarik Nailar bad ki don ha Saga County ha ka liang ka Tibet ha ka por ba ka jingshlei um jong ka Glacial Lake Outburst Flood (GLOF) lane ka Flash flood kaba la lynshop ha katei ka thaiñ ha ka 26 tarik Nailar, kaba la pynthut ïa ka leit ka wan jong ki.
U Myntri Rangbah ka jylla u Prem Singh Tamang u la ïakren bad baroh 8 ngut ki nongleit ïaid riewblei lyngba ka phone ha ka sngi Palei bad kylli bniah halor ka jingshngaiñ bad jingbha jingmiat jong ki, ong ka khubor.
La ïathuh ba ki nongleit ïaid riewblei, ki la don ha ka jingshngaiñ0 ha ka Saga County, watla ka jingleit jingwan ha katei ka thaiñ, ka dang shah ktah ha katei ka jingjia.
Ka sorkar jylla ka la thaw ïa ka kynhun treikam ban pynïadei, buddien bad pynsuk ïa ka jingïarap ïa ki nongshong shnong jong ka Sikkim kiba shah ktah ne sahkut ha ka jingshlei um.
Kane ka kynhun treikam ka dang ïatreilang bad ka tnad kam bar ri bad ka pynneh ïa ka jingïadei bad ki nongshong shnong kiba shah ktah bad ki bahaïing hasem jong ki, la ong ka SSDMA.
Ka thaiñ khappud Nepal-Tibet ka dang ïakhun pyrshah ïa ki jingeh hadien ka jingshlei um, kaba la pynlong ïa ki jaka kiba heh ban shah khang bad pynthut ïa ka jingïaid lynti ha ka lynti ïaid jong ki nongleit ïaid riewblei, la ong ka SSDMA.
Ka bor pynïaid ka la buh ruh ïa ka helpline kaba 24×7 ha ka State Emergency Operations Centre na ka bynta ki longïing kiba wad jingtip ne jingïarap.
Ki number ai jingïarap ki long 03592-201145, 03592-202461 bad 03592-2025256.
