Shillong, Nailar 30
Ka Nongstoiñ Diocese Catholic Youth Movement (NDCYM), Shillong Unit ka la lum lang ïa ki samla kiba sah ha nongbah Shillong da kaba pynlong ïa ka 2nd Annual Sports Meet 2026 ha ka sngi Saitjaiñ ha Nongthymmmai Parish ha kaba la wan shim bynta da 24 tylli ki Parish kiba hap hapoh ka Nongstoiñ Diocese.
Ka jingpynlong ïa kane ka lympung ïalehkai kaba shi sngi ka long kum ka jingïakynduh lang hapdeng ki para samla jong ka Nongstoiñ Diocese kiba shong ba sah ha nongbah Shillong, ban ithuh ithaw bad ban ïakit iabah ha ka khia ka shon hapdeng jong ki.
Ha kane ka sngi la ïadon lang u President of Meghalaya Film Makers Association bad uba long ruh u President ka Hills Farmers Union, u Bah Commander Shangpliang kum u kongsan ha ryngkat ka jingïadon lang u Fr. James Thyrniang, Spiritual Youth Director ka Nongstoiñ Diocese Catholic Youth Movement, Shillong Unit, ki samla kiba hapoh ha ka Nongstoiñ Diocese kiba sah ha Shillong bad kiwei kiwei.
Ha kane ka lympung ïalehkai ba shi sngi la pynlong da ka jingïalehkai phubol na ka bynta ki shynrang, katba ka jingïalehkai basketball jong ki shynrang bad kynthei.
Ha ka final Basketball jong ki khynthei la jop da Umdang Parish ïa ka Sonapahar Parish da 28-18 poiñ, katba ha ka liang ki shynrang ka Sonapahar Parish ka la jop ïa ka Parïong Parish da 28-5 poiñ. Ha ka final jong ka jingïalehkai phutbol la jop da Nonghyllam Parish ïa ka Mawpat Parish da 3-1 kol.
