Shillong, Nailar 30
Myntri ka tnat ïalehkai u Bah Wailadmiki Shylla u la ong ba ka Sorkar Jylla ka la leh kaba bha tam na ka bynta ban pynbit pynbiang ïa ki nongïalehkai khamtam eh haba ka Jylla kan pdiang ïa ka 39th National Games, kaba la thmu ban pynlong ha u Lber jong u snem ban wan.
“Lada ngi phai dien hashwa u snem 2019, phi lah ban mutdur ba ki nongïalehkai kiba khur takma ksiar ha ka National Games ki ïoh tang T.7500, kumjuh T. 5000 bad T.3000 ïa kiba khur takma rupa bad rnong. Hynrei naduh ba la pyntreikam ïa ka Sports Policy, ki nongïalehkai ki la ïoh jingïarap kham bun shah na ka Sorkar kaba long haduh T.2 lak ïa kiba khur takma ksiar, T. 1.5 lak (takma rupa) bad T. 1 lak (takma rnong),” la pynpaw u Bah Shylla ha ka jingpynkup burom ïa ki nongïalehkai, ha ka jingrakhe ïa ka National Sports Day, kaba la long ha ka sngi Saitjaiñ ha State Convention Centre, Shillong.
“Kane ka dangdei tang ka jingsdang ka jong ngi ba ngin pynurlong ïa ki jingthmu. Kaba kham kongsan eh kaba ngi la buh ïa ka thong hakhmat jong phi ki nongïalehkai ba lada phi lah ban khur takma ha ka 39th National Games 2027, ka kam sorkar ka la ap lypa ïa phi bad phim donkam ban dangpyndep ïa ki interview,” u la bynrap.
Dangshen mynta u snem, ka Sorkar Jylla ka la pynkhamti da ka kam Sorkar ïa u Pynshngaiñ Kurbah hapoh ka Meghalaya Outstanding Sportsperson Direct Appointment Policy, hadien ba utei u khlur nongking lieng ka Jylla u la wanrah burom da kaba khur ïa ka takma rnong kaba nyngkong eh ha ka 38th National Games kaba la long ha Uttarakhand.
Te kumta u Bah Shylla u la kyntu ïa ki nongïalehkai ba kin trei shitom nangne shakhmat khnang ba ki lah ban khur takma ha ka 39th National Games ha u 2027.
Ha kaba ïadei bad ki jaka ïalehkai, u Bah Shylla u la ong ba ka Sorkar ka la dangpyrshang katba lah ban pynbiang ïa ki jaka ïalehkai ha kylleng ka Jylla bad ki jingtei ki dangïaid shaphrang na ka bynta ban pynkhreh ïa katei ka lympung.
Ïa katei ka prokram la pynlong da ka tnat Directorate of Sports and Youth Affairs ka Sorkar Jylla ban pynkup burom ïa baroh ki nongïalehkai jong ki jait jingïalehkai kiba la ïoh rung ha ka thup jong ka Olympic bad kiwei ki bym pat ïoh rung (Non Olympic Discipline), hynrei ki dei pat kiba la wanrah nam bad burom ïa ka Jylla ha ki lympung ïalehkai kiba la long ha kylleng ka Jylla bad wat shabar ri ruh kumjuh na ka bynta u snem 2025.
Kane ka jingrakhe ïa ka National Sports Day ka long shi bynta ban kynmaw burom ïa ka lyngkhuh sngi kha jong u khlur ïalehkai hockey barim jong ka ri, u Major Dhyan Chand.
Nalor u Bah Wailadmiki kum u kongsan, la ïadon lang ruh u Chief Secretary ka Jylla u Dr. Shakil P. Ahammed (IAS), u Director ka tnat ïalehkai Bah Alertson Nongbri, u General Secretary ka Meghalaya State Olympic Association Bah Finely Lad Pariat, ki ophisar ka tnat ïalehkai lem bad ki nongïalehkai.
