Shillong, Nailar 30
Ka shlem treikam jong ka PHE, RWS Jowai, West Jaiñtia Hills District, ryngkat bad ka jingïatreilang bad ka District Sports Office, West Jaiñtia Hills District, ha ka sngi Saitjaiñ ka la pynlong ïa ka jingïakop mareh ne ka Marathon.
Shwa ban sdang jong ka jingïakop, la pynlong ïa ka jingbatai ïa ka lynti (route) kaba la batai da ki briew jong ka District Sports Office, West Jaiñtia
Ha ka jingmareh jong ki shynrang, la kaweh lama da u Bah P. Lyngdoh, uba long ruh u Chairman ka Jowai Municipal Board kum u kongsan ha kaba la ïadon lang u Executive Engineer, PHE, RWS Jowai, bad u SDO Electrical. Katba ha ka jingmareh jong ki kynthei, la kaweh lama da ki ar ngut ki SDO jong ka Jowai Sub-Division bad ka Amlarem Sub-Division.
Ki la don 200 ngut ki nongïashim bynta, kiba kynthup lang ïa ki kynthei bad ki shynrang. Ladon lang ruh ki Traffic Police bad ki Staff jong ka DMHO (Ambulance) West Jaiñtia Hills District khnang ban don ka suk ka saiñ haba mareh sha surok khamtam ïa ki nongmareh.
Ha kaba kut jong ka Marathon kaba la pynlong ha madan Jrisalein, la pynïaid ïa ka jingïalang da u Bah H. Bareh, ha kaba la ïoh ruh ka jingkren lyngkot shaphang ka jingrakhe ïa ka Rajya Jal Utsav da u Executive Engineer, RWS Jowai, PHE, u Bah S. Najiar.
Ïa ka nam nongjop ha ka liang ki kynthei la rah da ka Marwa Shylla (26:49 sekhon) ha ryngkat ka song pisa kaba T. 10,000, bar-ar ka Happiness Phawa (27:22sekhon) ryngkat ka song pisa kaba T. 7,500, bad balai ka Pynbait Shylla (27:33sekhon) kaba la ïoh T. 5,000. Ha ka liang ki shynrang la jop da u Junom Phawa (39:26 sekhon) ryngkat ka song pisa kaba T. 10,000, ba-ar u Wandathrang Phawa (39:36sekhon) ha kaba u la ïoh T. 7,500 bad balai u Sanctify Pale (40:12 sekhon) uba la ïoh T.5,000
Shuh shuh kum ka dak jong ka jingpynshlur ïa ki nongshim bynta, lah sam ruh mar T. 1000 ïa ki lai ngut kiba la rangbah tam bad ba dang khynnah tam. La sam ïa kine ki khusnam da ka SDO Jowai Sub-Division, ka Kong L. Pasi, bad ka SDO Amlarem, Special Investigation Amlarem, ka Kong D. Ksoo, u Bah P. Lyngdoh bad kiwei.
