Khliehriat, Nailar 30
Ka Moonongtdu SC bad ka Tongseng Youth SYSC ki la jam sha ka quarter final jong ka lympung ïalehkai 3rd Division Football Tournament ba la pynïaid da ka East Jaiñtia Hills District Football Association (EJHDFA), hadien ba ki la khur jingjop ha ka sngi Saitjaiñ.
Ha ka jingïalehkai kaba la long ha madan artificial turf Diengshynrum kaba ha Khliehriat, ka Moonongtdu SC ka la pynliem noh ïa ka Wahsarang SC da 3-0 kol.
U Poibiang Lamurong u la thep ar kol ha ka minit kaba 28 & 40+2, katba ïa kawei pat la thep kham hashwa da u Etilast Lyngdoh (19).
Haba phai sha kawei pat ka jingïalehkai kaba bud, ka Tongseng Youth SYSC ka la jop ïa ka Umstain SSCC lyngba ka tie-breaker da 5-4 kol hadien ba kine ki kynhun ki la ïathep mar 1-1 kol.
Na ka bynta ka Umstain la thep kol nyngkong eh da u Eveningland Pohshna (1) , hynrei ka Tongseng Youth ka la pynïakhaid kylla lyngba u Fining Lyngdoh (61).
