Shillong, Nailar 30
Ki ar ngut ki khlur ïalehkai phutbol ka Jylla, u Phrangki Buam bad ka Sanfida Nongrum ki la ïohpdiang ïa ka jingithuh halor ka jingtbit kum u nongïalehkai ha ka aïom ba la lah, ha ka pynkup burom (awards night) da ka Football Players Asso-ciation of India kaba la long ha ka sngi Saitjaiñ.
U Phrangki u la ïohdiang ïa ka khusnam Young Player of the Year ha ka liang ki shynrang, katba ka Sanfida ka la ïohpdiang ïa ka nam Young Player of the Year ha ka liang ki kynthei.
Ka khusnam kaba kham heh duh jong ka Player of the Year ha ka liang ki shynrang bad kynthei ka leit sha u rangïalehkai shapdeng ka Mohun Bagan u Lallian-zuala Chhangte bad ka Manisha Kalyan.
Kumba ka paw ka Sanfida ka la ïoh ban mihkhmat ï aka ri India ha ka lympung ïalehkai shabar ri ha ka sien kaba nyngkong eh mynta u snem, ha kaba u la ïoh ban thep kol ha ki 7 minit kaba long kaba nyngkong eh ba la lah ban pynurlong ha ka AFC Women’s Asian Cup 2026 kaba la long ha Australia. Ka la ïohpdiang ïa ka nam Most Valuable Player ha ka SAFF Women’s Championship 2026, ha kaba ka India ka la khur ïa ka nam lahduh.
Haba phai sha u Phrangki u la ïohpdiang ïa ka nam Most Valuable Player ha ka Indian Football League 2005-26. U la ïoh ban thep 8 kol ha katei ka lympung bad sa tang khyndiat u la jan ïaryngkat bad u Marcus Joseph, uba la thep 9 kol.
Ym tang kane ka nam ba u la ïoh, hynrei ka klob ka jong u ka Shillong Lajong FC ka la lah ban wan ha ka kyrdan ba-ar ha ka sien kaba nyngkong naduh ba ka la rung sha ka I-League ha u snem 2009.
Ha katei ka sngi la pynkup burom ruh ïa kiwei pat ki nongïalehkai kata ka Young Player of the Year sha u Sanan Mohammed K, Foreign Player of the Year (Miguel Figueira Damasceno), Coach of the Year (Owen Coyle), Women’s Coach of the Year (Anthony Andrews), Coach Education Award (Savio Medeira), Player Perfor-mance & Development Award (Rapid Sports & The Right Weigh), ISL Champions 2025-26 (East Bengal FC) bad ka IWL Champions 2025-26 (East Bengal FC Women).
